LAO PDR
ໃນວັນທີ 2 ທັນວາ 2021, ເວລາ 9:00 ໂມງ ທີ່ ຫ້ອງປະຊຸມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ນຳພາຄະນະຜູ້ແທນລາວ ທີ່ມາຈາກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ກະຊວງການຕ່າງປະເທດ ເຂົ້າຮ່ວມ ກອງປະຊຸມ ທະເລອາຊີຕາເວັນອອກ (East Asian Sea Congress) ແລະ ກອງປະຊຸມລັດຖະມົນຕີ ຄັ້ງທີ 7 ປະຈໍາປີ 2021 ໂດຍຜ່ານລະບົບປະຊຸມທາງໄກ (Video Conference). ກອງປະຊຸມຄັ້ງນີ້ ໄດ້ຈັດຂຶ້ນໂດຍການເປັນປະທານຂອງ ທ່ານ ໄສ ສະຫມໍ່ (Say Samal) ລັດຖະມົນຕີ ກະຊວງສິ່ງແວດລ້ອມ ແຫ່ງ ຣາຊາອານາຈັກກຳປູເຈຍ ແລະ ມີ ທ່ານ ລັດຖະມົນຕີ ແລະ ຮອງລັດຖະມົນຕີ ຈາກກະຊວງທີ່ກ່ຽວຂ້ອງ ຂອງບັນດາປະເທດສະມາຊິກ 11 ປະເທດ ຈາກ ສປ ຈີນ; ສາທາລະນະລັດ ປະຊາທິປະໄຕ ເກົາຫຼີ; ສາທາລະນະລັດ ອິນໂດເນເຊຍ; ຍີ່ປຸ່ນ; ສາທາລະນະລັດ ຟີລິບປິນ; ສາທາລະນະລັດ ເກົາຫຼີ; ສາທາລະນະລັດ ສິງກາໂປ; ສາທາລະນະລັດ ປະຊາທິປະໄຕ ຕີມໍເລສເຕ; ສາທາລະນະລັດ ສັງຄົມນິຍົມ ຫວຽດນາມ. ນອກຈາກນີ້, ຍັງມີຜູ້ຄະນະຜູ້ແທນ, ຜູ້ສັງເກດການ ແລະ ສື່ມວນຊົນ ເຂົ້າຮ່ວມຫຼາຍກວ່າ 150 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອຮ່ວມກັນປຶກສາຫາລື ກຳນົດແບບແຜນຈັດຕັ້ງປະຕິບັດ ກ້າວສູ່ປີ 2030 ໂດຍສະເພາະແມ່ນແຜນດຳເນີນງານ ປີ 2023-2027 ແລະ ຮັບຮອງເອົາ ຖະແຫຼງການລັດຖະມົນຕີ ສີຫານຸກ ປີ 2021.ກອງປະຊຸມຄັ້ງນີ້, ບັນດາປະເທດສະມາຊິກ ໄດ້ ຮ່ວມກັນ ກຳນົດແບບແຜນຈັດຕັ້ງປະຕິບັດ ກ້າວສູ່ປີ 2030 ໂດຍສະເພາະແມ່ນແຜນດຳເນີນງານ ປີ 2023-2027 ເຊິ່ງກວມເອົາ 4 ກິດຈະກຳ ບູລິມະສິດ ຄື: 1)ສ້າງຄວາມເຂັ້ມແຂງໃຫ້ອົງການຈັດຕັ້ງໃຫ້ມີປະສິດທິພາບ; 2)ຄວາມອຸດົມສົມບູນທາງທະເລມະຫາສະໝຸດ; 3)ການເປັນຢູ່ຂອງສັງຄົມ; ແລະ 4)ຄວາມອຸດົມສົມບູນທາງດ້ານເສດຖະກິດ. ພ້ອມກັນນີ້, ກໍ່ໄດ້ຮັບຮອງເອົາຖະແຫຼງການລັດຖະມົນຕີ ສີຫານຸກ ປີ 2021 ໃນຫົວຂໍ້ ‘’ແບບແຜນກ້າວສູ່ ການພັດທະນາແບບຍືນຍົງ: ເສັ້ນທາງສູ່ປີ 2030 ເພື່ອຄວາມສົມບູນ ທາງດ້ານ ມະຫາສະໝຸດ, ສັງຄົມ ແລະ ເສດຖະກິດ (ADVANCING OUR SUSTAINABLE DEVELOPMENT AGENDA: ROAD TO 2030 FOR HEALTHY OCEANS, PEOPLE AND ECONOMIES)’’. ພ້ອມດຽວກັນນີ້, ທ່ານ ຈັນທະເນດ ບົວລະພາ ກໍ່ໄດ້ປະກອບຄໍາເຫັນຕໍ່ກອງປະຊຸມວ່າ:ກອງປະຊຸມລັດຖະມົນຕີ ຄັ້ງທີ 7 ປະຈໍາປີ 2021 ນີພວກເຮົາ ແມ່ນໄດ້ຮ່ວມກັນຮັບຮອງ ຖະແຫຼງການລັດຖະມົນຕີ ສີຫານຸກ ເພື່ອກ້າວສູ່ ການພັດທະນາແບບຍືນຍົງ: ເສັ້ນທາງສູ່ປີ 2030 ເພື່ອຄວາມສົມບູນ ທາງດ້ານ ມະຫາສະໝຸດ, ສັງຄົມ ແລະ ເສດຖະກິດ ພວກເຮົາບັນດາປະເທດສະມາຊິກ ແມ່ນຈະສືບຕໍ່ສະໜັບສະໜູນ ແລະ ຮ່ວມງານ ກັບ ອົງການຄູ່ຮ່ວມງານ ດ້ານການຄຸ້ມຄອງສິ່ງແວດລ້ອມ ໃນຂົງເຂດທະເລອາຊີຕາເວັນອອກ (PEMSEA) ໃນການຈັດຕັ້ງປະຕິບັດແບບແຜນຈັດຕັ້ງປະຕິບັດ ກ້າວສູ່ປີ 2030 ແລະ ແຜນດຳເນີນງານ ປີ 2023-2027. ເຖິງຢ່າງໃດກໍ່ຕາມ, ທິດທາງໃນຕໍ່ໜ້າ ສປປ ລາວ ແມ່ນຮຽກຮ້ອງມາຍັງ ອົງການ PEMSEA, ປະເທດສະມາຊິກ ແລະ ປະເທດຄູ່ຮ່ວມເຈລະຈາ ສືບຕໍ່ໃຫ້ການສະໜັບສະໜູນ ຊ່ວຍເຫຼືອ ທາງດ້ານວິຊາການ; ສົ່ງເສີມການແລກປ່ຽນຄວາມຮູ້, ປະສົບການ ແລະ ຊ່ຽວຊານ ໃນການຄຸ້ມຄອງຊັບພະຍາກອນນໍ້າແບບເຊື່ອມສານ, ການຄຸ້ມຄອງໄພນໍ້າຖ້ວມ ໄພແຫ້ງແລ້ງ, ການວາງແຜນ ແລະ ພັດທະນາອ່າງຮັບນໍ້າ ລວມທັງການປັບຕົວ ຕໍ່ກັບ ການປ່ຽນແປງດິນຟ້າອາກາດ ແລະ ການສ້າງຄວາມເຂັ້ມແຂງທາງດ້ານບຸກຄະລາກອນ ເພື່ອການຈັດຕັ້ງປະຕິບັດ ແບບແຜນຈັດຕັ້ງປະຕິບັດ ກ້າວສູ່ປີ 2030 ແລະ ແຜນດຳເນີນງານ ປີ 2023-2027 ໄດ້ຮັບປະສິດທິພາບ ແລະ ປະສິດທິຜົນ. ກອງປະຊຸມໄດ້ປິດລົງໃນເວລາ 11:00 ໂມງ ຂອງວັນດຽວກັນ ດ້ວຍຜົນສຳເລັດອັນຈົບງາມ.