Khao

• 

• 

• 

• 

• 

• 

• 

• 

• 

• 

• 

ໃນຕອນບ່າຍຂອງວັນທີ 6 ກຸມພາ 2025 ທີ່ຜ່ານມາ, ທ່ານ ນາງ ບຸນຄຳ ວໍລະຈິດ ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ບຸດສະດີ ສັນຕິພິທັກສ໌, ຫົວໜ້າກອງເລຂາ ຄະນະກຳມາທິການແມ່ນໍ້າຂອງສາກົນ (CEO of MRCS) ພ້ອມດ້ວຍຄະນະ.
ໂອກາດດັ່ງກ່າວ ທ່ານ ນາງ ບຸນຄຳ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທີ່ທ່ານ ນາງ ບຸດສະດີ ສັນຕິພິທັກສ໌ ທີ່ໄດ້ຮັບການແຕ່ງຕັ້ງ ເປັນຫົວໜ້າ ກອງເລຂາ ຄະນະກຳມາທິການແມ່ນໍ້າຂອງສາກົນ (CEO of MRCS) ເຊິ່ງເປັນການສືບຕໍ່ພາລະກິດໃນການຄຸ້ມຄອງກອງເລຂາ ຄະນະກຳມາທິການແມ່ນໍ້າຂອງສາກົນ ຕາມສັນຍາແມ່ນໍ້າຂອງປີ 1995 ແລະ ທັງສອງຝ່າຍຍັງໄດ້ມີການແລກປ່ຽນ ແລະ ປຶກສາຫາລື ກ່ຽວກັບແຜນການ ແລະ ບຸລິມະສິດຂອງ ຄະນະກຳມາທິການແມ່ນໍ້າຂອງສາກົນ (MRC) ເປັນຕົ້ນແມ່ນການກະກຽມສະເຫຼີມສະຫຼອງ ວັນເຊັນສັນຍາແມ່ນໍ້າຂອງຄົບຮອບ 30 ປີ, ບັນຫາອື່ນໆທີ່ກ່ຽວຂ້ອງໃນອ່າງແມ່ນໍ້າຂອງ ເຊັ່ນ: ມົນລະພິດໝອກຄວັນຂ້າມແດນ, ຄຸນນະພາບນ້ຳ, ມົນລະພິດປລາສຕິກ ແລະ ຜົນກະທົບຈາກການປ່ຽນແປງຂອງດິນຟ້າອາກາດ ຢູ່ອ່າງແມ່ນ້ຳຂອງ. ພ້ອມທັງຍົກໃຫ້ເຫັນເຖິງຄວາມສຳຄັນຂອງການເພີ່ມທະວີການຮ່ວມມືກັບຄູ່ຮ່ວມມືເຝົ້າລະວັງແມ່ນ້ຳ, ລວມທັງຄວາມຈຳເປັນອັນຮີບດ່ວນຂອງແຜນທີ່ນ້ຳຖ້ວມ ແລະ ລະບົບເຕືອນໄພລ່ວງໜ້າເພື່ອກຽມພ້ອມຮັບມືກັບໄພພິບັດທາງທຳມະຊາດທີ່ອາດຈະເກີດຂຶ້ນໃນຕໍ່ໜ້າ.
ໃນຕອນທ້າຍ ທ່ານລັດຖະມົນຕີ ກໍໄດ້ອວຍພອນໃຫ້ທ່ານ ນາງ ບຸດສະດີ ສັນຕິພິທັກສ໌, ຈົ່ງປະສົບຜົນສຳເລັດໃນການປະຕິບັດໜ້າທີ່ເປັນ ຫົວໜ້າກອງເລຂາ ຄະນະກຳມາທິການແມ່ນໍ້າຂອງສາກົນ ຢູ່ ສປປ ລາວ ສືບຕໍ່ສ້າງຄວາມເຂັ້ມແຂງໃຫ້ບັນດາປະເທດສະມາຊິກ ຄະນະກຳມາທິການແມ່ນນໍ້າຂອງສາກົນ ໃຫ້ສາມາດກຸຸ້ມຕົນເອງໄດ້ພາຍໃນປີ 2030.

ແຫຼ່ງຂ່າວຈາກ: ໜ່ວຍຂ່າວ ກຊສ

• 

• 

• 

• 

• 

• 

• 

ໃນວັນທີ 31 ມັງກອນ 2025 ເວລາ 8:30 ໂມງ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ສືບຕໍ່ກອງປະຊຸມ ສະຫຼຸບການ ຈັດຕັ້ງປະຕິບັດວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳປີ 2024 ແລະ ທິດທາງແຜນການ ປີ 2025 ເປັນມື້ທີ່ 2 ໂດຍການເປັນປະທານ ກອງປະຊຸມ ຂອງ ທ່ານ ນາງ ບຸນຄຳ ວໍລະຈິດ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງ ແວດລ້ອມ. ຜູ້ແທນເຂົ້າຮ່ວມກອງປະຊຸມ ປະກອບມີ ລັດຖະມົນຕີ, ບັນດາຮອງລັດຖະມົນຕີຈາກກະຊວງ; ປະທານ, ຮອງປະທານ ອົງການທຽບເທົ່າກະຊວງ, ເຈົ້າແຂວງ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ທ່ານຫົວໜ້າຫ້ອງການ, ຮອງຫົວໜ້າຫ້ອງການ; ບັນດາຫົວໜ້າ, ຮອງຫົວໜ້າກົມ ຂອງພາກສ່ວນ ທີ່ກ່ຽວຂ້ອງ ຢູ່ຂັ້ນສູນກາງ, ຫົວໜ້າພະແນກ, ຮອງຫົວໜ້າພະແນກ, ຫົວໜ້າຂະແໜງ ຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ, ນະຄອນຫຼວງວຽງຈັນ ໃນຂອບເຂດທົ່ວປະເທດ.

ພາຍຫຼັງບັນດາທ່ານທີ່ເຂົ້າຮ່ວມກອງປະຊຸມ ໄດ້ປະກອບຄຳຄິດຄຳເຫັນ ຕໍ່ກອງປະຊຸມສະຫຼຸບການ ຈັດຕັ້ງປະຕິບັດວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳປີ 2024 ແລະ ທິດທາງແຜນການ ປີ 2025 ແລ້ວ ກອງປະຊຸມກໍ່ໄດ້ຕ້ອນຮັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ທີ່ໃຫ້ກຽດເຂົ້າຮ່ວມກອງປະຊຸມ ແລະ ໄດ້ຮັບຟັງການລາຍງານຜົນຂອງກອງປະຊຸມ ຈາກ ທ່ານ ນາງ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ທີ່ໄດ້ດຳເນີນມາເປັນ ເວລາ 2 ວັນ ໂດຍຍົກເອົາຫົວຂໍ້ທີ່ສໍາຄັນພົ້ນເດັ່ນມານຳສະເໜີລາຍງານ ແລະ ປຶກສາຫາລື ເປັນຕົ້ນ ວຽກທີ່ດິນ, ວຽກງານການຄຸ້ມຄອງຊັບພະຍາກອນນໍ້າ, ວຽກງານການແກ້ໄຂ ບັນຫາມົນລະພິດໝອກຄວັນ, ບັນຫາການຄຸ້ມຄອງສິ່ງແວດລ້ອມຂອງໂຄງການລົງທຶນ ແລະ ບັນຫາການຄຸ້ມຄອງປ່ຽນແປງດິນຟ້າອາກາດ ເຊິ່ງຕິດພັນກັບຄວາມຮັບຜິດຊອບຂອງຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ການຮັບຜິດຊອບຮ່ວມ ຂອງຂະແໜງການ ແລະ ທ້ອງຖິ່ນ, ເປັນບັນຫາທີ່ສັງຄົມໃຫ້ຄວາມສົນໃຈ ແລະ ເປັນບັນຫາທີ່ປະຊາຄົມໂລກ, ພາກພື້ນ ກໍາລັງເອົາໃຈໃສ່ໃນການແກ້ໄຂຮ່ວມກັນ ເຊິ່ງມັນຕິດພັນ ແລະ ກະທົບໂດຍກົງ ຕໍ່ເສດຖະກິດ-ສັງຄົມ ແລະ ການດຳລົງຊີວິດຂອງປະຊາຊົນ. ອັນນີ້, ຊີ້ໃຫ້ເຫັນເຖິງ ຄວາມສໍາຄັນຂອງວຽກງານຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ຄວາມເອົາໃຈໃສ່ຂອງຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມ ທີ່ໄດ້ຕັ້ງໜ້າປະຕິບັດໜ້າທີ່ ຕາມພາລະບົດບາດ ແລະ ການມອບໝາຍ ຢ່າງຕັ້ງໜ້າ. ການປະກອບຄໍາເຫັນ ຂອງບັນດາທ່ານ ຄະນະນໍາຈາກ ພາກສ່ວນຕ່າງໆ ຢູ່ຂັ້ນສູນກາງ ແລະ ທ້ອງຖິ່ນ ໄດ້ຕີລາຄາໃຫ້ເຫັນສະພາບການຈັດຕັ້ງປະຕິບັດຕົວຈິງ ມີທັງ ດ້ານດີ, ດ້ານອ່ອນ, ຂໍ້ຫຍຸ້ງຍາກ ແລະ ສິ່ງທ້າທາຍ ໃນການຈັດຕັ້ງປະຕິບັດໃນໄລຍະຜ່ານມາ ພ້ອມທັງ ໄດ້ແລກປ່ຽນບົດຮຽນ ແລະ ສະເໜີວິທີການແກ້ໄຂບັນຫາ, ຂໍ້ຄົງຄ້າງ, ຂອດຂັ້ນຕ່າງໆ ໃນການປະຕິບັດ ຜ່ານມາ ເພື່ອກໍານົດເປັນທິດທາງປະຕິບັດໃນປີ 2025 ກໍ່ຄືໃນແຜນ 5 ປີ ຄັ້ງທີ X ໃຫ້ແທດເໝາະກັບ ສະພາບຕົວຈິງ ແນໃສ່ຈັດຕັ້ງປະຕິບັດໃນຊຸມປີຕໍ່ໜ້າຢ່າງພາວະວິໃສ, ສອດຄ່ອງກັບສະພາບເງື່ອນໄຂຕົວຈິງ ແລະ ບັນລຸເປົ້າໝາຍທີ່ວາງໄວ້.

ໃນໂອກາດດຽວກັນ, ທ່ານ ນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳ ຕໍ່ກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ຂະແໜງການຍາດມາໄດ້. ຖ້າທຽບໃສ່ທ່າແຮງບົ່ມຊ້ອນ, ເງື່ອນໄຂຕົວຈິງ ແລະ ກັບຄວາມຮຽກຮ້ອງຕ້ອງການ ໃນໄລຍະໃໝ່ ໂດຍສະເພາະ ໄລຍະທີ່ພວກເຮົາພວມປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ໃນນັ້ນ ຍັງຈະຕ້ອງໄດ້ສືບຕໍ່ບຸກບຶນສູ້ຊົນ ເພື່ອປັບປຸງ ແລະ ແກ້ໄຂຂໍ້ຄົງຄ້າງຈໍານວນໜຶ່ງ ທີ່ແກ່ຍາວມາດົນແລ້ວ ຫຼື ບັນຫາທີ່ເກີດຂຶ້ນໃໝ່ຈໍານວນໜຶ່ງ ທີ່ຍັງບໍ່ທັນໄດ້ຮັບການປັບປຸງແກ້ໄຂໃຫ້ດີເທົ່າທີ່ຄວນ, ຊຶ່ງບັນດາຂໍ້ຫຍຸ້ງຍາກ ແລະ ຂໍ້ຄົງຄ້າງດັ່ງກ່າວນັ້ນ, ກອງປະຊຸມ ກໍໄດ້ພ້ອມກັນຍົກຂຶ້ນມາປຶກສາຫາລື ແລະ ສະະເໜີມາດຕະການແກ້ໄຂລະອຽດແລ້ວ, ເຊິ່ງທ່ານນາຍົກລັດຖະມົນຕີກໍໄດ້ມີຄໍາເຫັນແລກປ່ຽນ ແລະ ເນັ້ນຕື່ມບາງວຽກງານ ຄືດັ່ງນີ້:

1) ວຽກທີ່ດິນ: (1) ໃຫ້ສືບຕໍ່ຈັດຕັ້ງຜັນຂະຫຍາຍມະຕິຂອງຄະນະບໍລິຫານງານສູນກາງພັກ ສະບັບເລກທີ 026/ຄບສພ ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ໃຫ້ມີຜົນສໍາເລັດ; (2) ສູ້ຊົນຈັດຕັ້ງປະຕິບັດວຽກງານຂຶ້ນທະບຽນອອກໃບຕາດີນໃຫ້ບັນລຸຕົວເລກຄາດໝາຍ 300,000 ຕອນ ໃນປີ 2025; (3) ຮີບຮ້ອນຈັດຕັ້ງປະຕິບັດມະຕິ ສະບັບເລກທີ 57/ຄປຈ ວ່າດ້ວຍການພິຈາລະນາຮັບຮອງ ການຮັບຮູ້ສິດນໍາໃຊ້ທີ່ດິນໃນເຂດທີ່ດິນປ່າໄມ້ໃຫ້ມີປະສິດທິຜົນ; (4) ເອົາໃຈໃສ່ຈັດຕັ້ງປະຕິບັດແຜນແມ່ບົດຈັດສັນທີ່ດິນແຫ່ງຊາດ ຮອດປີ 2030 ໂດຍຈັດສັນທີ່ດິນໃຫ້ໄດ້ຕາມເປົ້າໝາຍ (ເນື້ອທີ່ດິນທີ່ຈະສະຫງວນ ແລະ ອະນຸລັກໃຫ້ ໄດ້ 70% ແລະ ເນື້ອທີ່ດິນທີ່ຈະນໍາໃຊ້ ແລະ ພັດທະນາ 30%); (5) ເພີ່ມທະວີການປະສານສົມທົບກັບບັນດາຂະແໜງການ ແລະ ອົງການປົກຄອງທ້ອງຖິ່ນສ້າງແຜນ ຈັດສັນທີ່ດິນຂັ້ນເມືອງ ແລະ ບ້ານ ໃຫ້ສໍາເລັດໃນຂອບເຂດທົົ່ວປະເທດ ເພື່ອໃຫ້ມີຂໍ້ມູນທີ່ດິນແຕ່ລະປະເພດຢ່າງລະອຽດ ແລະ ເປັນບ່ອນອີງໃນການຂື້ນທະບຽນອອກໃບຕາດິນ, ເກັບອາກອນ ທີ່ດິນປະຈໍາປີ; (6) ຊຸກຍູ້ບັນດາຂະແໜງ ການ ຂື້ນບັນຊີທີ່ດິນລັດ ແລະ ສ້າງຍຸດທະສາດ ແລະ ແຜນການນໍາໃຊ້ທີ່ດິນທີ່ຕົນເອງຄຸ້ມຄອງ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ; (7) ໃຫ້ກວດຄືນ ແລະ ດັດປັບເຂດປະເມີນລາຄາທີ່ດິນ ແລະ ແຜນທີ່ປະເມີນລາຄາໃຫ້ແທດເໝາະຕົວຈິງ; ( ສຸມໃສ່ການຫັນເປັນທັນສະໄໝໃນວຽກງານການຄຸ້ມຄອງທີ່ດິນ ແລະ ພັດທະນາລະບົບຖານຂໍ້ມູນທີ່ດິນ ໃຫ້ສໍາເລັດໂດຍໄວ ເພື່ອເຊື່ອມຕໍ່ລະບົບຖານຂໍ້ມູນທີ່ດິນໃນການຈັດເກັບລາຍຮັບ ກ່ຽວກັບ ທີ່ດິນ; (9) ເລັ່ງຫັນເອົາທຸລະກິດການຊື້-ຂາຍທີ່ດິນ (ການໂອນກໍາມະສິດທີ່ດິນ), ການປ່ຽນປະເພດທີ່ດິນໃຫ້ເຂົ້າສູ່ລະບຽບການ ແລະ ເຂົ້າໃນລະບົບຄຸ້ມຄອງທີ່ທັນສະໄໝ ແລະ ກໍານົດການຊໍາລະຜ່ານລະບົບທະນາຄານ; (10) ໃຫ້ກວດກາ ແລະ ປະເມີນຄືນບັນດາໂຄງການໃຫ້ເຊົ່າ-ສໍາປະທານທີ່ດິນຂອງລັດ ໂດຍໃຫ້ກວດກາເນື້ອທີ່ດິນຄືນ, ໂຄງການໃດບໍ່ປະຕິບັດພັນທະທາງດ້ານພາສີອາກອນທີ່ດິນ ຫຼື ບໍ່ພັດທະນາ ກໍ່ໃຫ້ມີມາດຕະການດ້ານວິໄນຕ່າງໆ ລວມທັງການກ້າວໄປເຖິງການຖອດຖອນສິດນໍາໃຊ້ທີ່ດິນຂອງໂຄງການ; ແລະ (11) ໃຫ້ສືບຕໍ່ແກ້ໄຂບັນຫາປະກົດການຫຍໍ້ ແລະ ຫາງສຽງປະຊາຊົນ ກ່ຽວກັບ ວຽກງານທີ່ດິນ;

2) ວຽກສິ່ງແວດລ້ອມ: (1) ໃຫ້ເອົາໃຈໃສ່ປັບປຸງລະບົບ ແລະ ສ້າງກົນໄກເພື່ອປ້ອງກັນ, ຫຼຸດຜ່ອນ ແລະ ແກ້ໄຂບັນຫາມົນລະພິດຕ່າງໆ ໂດຍສ້າງໃຫ້ມີການຫັນປ່ຽນແທ້ ແລະ ມີຕົວຊີ້ວັດທີ່ຊັດເຈນ; (2) ໃຫ້ປະສານສົມທົບກັບພາກສ່ວນກ່ຽວຂ້ອງ ຈັດຕັ້ງປະຕິບັດວຽກງານການຄຸ້ມຄອງສິີ່ງເສດເຫຼືອຢ່າງເອົາຈິງເອົາຈັງ ໂດຍສະເພາະ ສິ່ງເສດເຫຼືອປຣາດສະຕິກ ໂດຍຫຼຸດຜ່ອນການນໍາໃຊ້ ປຣາດສະຕິກຄັ້ງດຽວ ຖີ້ມ ແລະ ຫັນມານໍາໃຊ້ຜະລິດຕະພັນທົດແທນ; (3) ປະສານສົມທົບກັບກະຊວງກະສິກໍາ ແລະ ປ່າໄມ້ ແລະ ອົງການປົກຄອງທ້ອງຖິ່ນ ເພື່ອແກ້ໄຂບັນຫາມົນລະພິດໝອກຄວັນ ແລະ ໄຟໄໝ້ປ່າ ຢ່າງຈິງຈັງ ແລະ ມີຮູບປະທໍາ ພ້ອມນັ້ນ ກໍສົມທົບກັບປະເທດໃກ້ຄຽງ (ໂດຍສະເພາະ ປະເທດໄທ ແລະ ມ້ຽນມາ ທີ່ນາຍົກທັງ 3 ປະເທດ ໄດ້ຕົກລົງກັນ) ເພື່ອສ້າງ ແລະ ຈັດຕັ້ງປະຕິບັດແຜນດໍາເນີນງານຮ່ວມກັນໃຫ້ມີປະສິດທິຜົນ;(4) ສົ່ງເສີມເສດຖະກິດໝູນວຽນ ໃຫ້ເປັນຮູບປະທໍາ ເພື່ອນໍາໃຊ້ຊັບພະຍາກອນຢ່າງມີປະສິດທິຜົນ ແລະ ຫຼຸດຜ່ອນບັນຫາສິ່ງເສດເຫຼືອ; (5) ເພີ່ມທະວີການໂຄສະນາ ແລະ ສ້າງຈິດສໍານຶກໃຫ້ແກ່ປະຊາຊົນດ້ວຍຫຼາຍຮູບແບບ ເພື່ອສ້າງໃຫ້ສັງຄົມມີສ່ວນຮ່ວມໃນການຄຸ້ມຄອງຊັບພະຍາກອນທໍາມະຊາດ ແລະ ປົກປັກຮັກສາສິ່ງແວດລ້ອມ; (6) ຊຸກຍູ້ ການສ້າງຕົວເມືອງ, ຂຽວ ສະອາດ ງາມຕາ ແລະ ການສ້າງຕົວເມືອງຍືນຍົງ ໃຫ້ເປັນຮູບປະທໍາຫຼາຍຂຶ້ນ ໂດຍສຸມໃສ່ຕົວເມືອງໃຫຍ່ ແລະ ເມືອງທີ່ຄວາມອຸດົມສົມບູນທາງດ້ານລະບົບນິເວດ ເພື່ອສ້າງໃຫ້ໄດ້ເມືອງຕົວແບບ ແລະ ຂະຫຍາຍຜົນໄປສູ່ຕົວເມືອງອື່ນ ໃນນີ້ໃຫ້ຊຸກຍູ້ທ້ອງຖິ່ນເປັນເຈົ້າການຫຼາຍຂື້ນຈື່ງຈະມີລັກສະນະຍືນຍົງ; (7) ໃຫ້ສືບຕໍ່ຈັດຕັ້ງປະຕິບັດຂອດຂັ້ນການພິຈາລະນາອອກໃບຢັ້ງຢືນກ່ຽວກັບສິ່ງແວດລ້ອມໃຫ້ມີຄວາມວ່ອງໄວ ແລະ ມີປະສິດທິພາບ ຕອບສະໜອງນະໂຍບາຍການປັບປຸງບັນຍາກາດການລົງທຶນຂອງລັດຖະບານ ພ້ອມທັງຕິດຕາມ ກວດກາ ການຈັດຕັ້ງປະຕິບັດວຽກງານຄຸ້ມຄອງສິ່ງແວດລ້ອມຂອງໂຄງການລົງທຶນໃຫ້ເປັນປົກກະຕິ ເພື່ອຮັບປະກັນການພັດທະນາໃຫ້ໄປຕາມທິດການເຕີບໂຕສີຂຽວ ແລະ ຍືນຍົງ;

3) ວຽກການຄຸ້ມຄອງການປ່ຽນແປງດິນຟ້າອາກາດ: (1) ຕ້ອງເອົາໃຈໃສ່ປະຕິບັດຢ່າງເອົາຈິງ ເອົາຈັງ ບັນດາພັນທະຂອງສົນທິສັນຍາສະຫະປະຊາຊາດ ວ່າດ້ວຍການປ່ຽນແປງດິນຟ້າອາກາດ (UNF CCC), ສົນທີສັນຍາ ແລະ ສັນຍາທີ່ກ່ຽວຂ້ອງທີ່ ສປປ ລາວ ເຂົ້າເປັນພາຄີ ລວມທັງ ປະຕິບັດຄາດໝາຍໝັ້ນ ທີ່ລັດຖະບານໄດ້ສະເໜີຕໍ່ບັນດາກອງປະຊຸມຂອງປະເທດສະມາຊິກ ໂດຍສະເພາະ COP29 ໂດຍຫັນເປັນແຜນງານ, ແຜນການ, ໂຄງການ ແລະ ນິຕິກໍາລະອຽດ ແລະ ເພີ່ມທະວີການປະສານສົມທົບກັບບັນດາກະຊວງຂະແໜງການ, ອົງການປົກຄອງທ້ອງຖິ່ນ ແລະ ພາກເອກະຊົນ ເພື່ອຮ່ວມກັນປະຕິບັດຍຸດທະສາດ ແລະ ແຜນງານທີ່ມີແລ້ວໃຫ້ປະກົດຜົນເປັນຈິງ; (2) ເອົາໃຈໃສ່ສ້າງຄວາມເຂັ້ມແຂງໃນການສ້າງຄວາມທົນທານ ແລະ ປັບຕົວເຂົ້າກັບການປ່ຽນແປງດິນຟ້າອາກາດ ໂດຍໃຫ້ມີການສຶກສາຄວາມສ່ຽງ, ວາງແຜນປ້ອງກັນ, ແກ້ໄຂ ແລະ ຟື້ນຟູໄພພິບັດໃຫ້ທັນກັບສະພາບການ; (3) ສິ່ງສໍາຄັນຕ້ອງໄດ້ຍົກລະດັບຄວາມເຂົ້າໃຈ ແລະ ສ້າງຈິດສໍານຶກວຽກງານດັ່ງກ່າວ ໃຫ້ກວ້າງຂວາງ, ເລິກເຊິ່ງ ແລະ ຫຼາຍຂຶ້ນກວ່າເກົ່າ ທັງຢູ່ຂັ້ນສູນກາງ ແລະ ທ້ອງຖິ່ນ; (4) ວຽກງານການປ່ຽນແປງດິນຟ້າອາກາດເປັນວຽກງານທີ່ສາກົນໃຫ້ຄວາມສໍາຄັນ ແລະ ມີທຶນສະໜັບສະໜູນຢ່າງຫຼວງຫຼາຍ. ສະນັ້ນ, ຕ້ອງໄດ້ສ້າງຄວາມເຂັ້ມແຂງ ເພື່ອເຂົ້າຫາແຫຼ່ງທຶນ ພ້ອມທັງຮັບປະກັນການນໍາໃຊ້ທຶນໃຫ້ມີປະສິດທິຜົນສູງ; (5) ໃຫ້ສືບຕໍ່ສົ່ງເສີມການຊື້-ຂາຍສິນເຊື່ອກາກບອນ ໂດຍສະເພາະຈາກປ່າໄມ້, ພະລັງງານສະອາດ ແລະ ອື່ນໆ ໂດຍການຈັດຕັ້ງຜັນຂະຫຍາຍດໍາລັດ ວ່າດ້ວຍສິນເຊື່ອກາກບອນໃຫ້ເປັນຮູບປະທໍາ ເພື່ອຮັບປະກັນການສ້າງຜົນປະໂຫຍດ ໃຫ້ແກ່ປະເທດຊາດຢ່າງແທ້ຈິງ;

4) ວຽກຊັບພະຍາກອນນໍ້າ, ອຸຕຸນິຍົມ ແລະ ອຸທົກກະສາດ: (1) ໃຫ້ຄົ້ນຄວ້າກົນໄກການຄຸ້ມຄອງນໍ້າ ໃຫ້ຊັດເຈນ ລະຫວ່າງ ຂະແໜງການທີ່ນໍາໃຊ້ນໍ້າ ເພື່ອຄວາມເອກະພາບ ແລະ ມີການຈັດສັນນໍ້າຢ່າງເໝາະສົມ ເຊັ່ນ: ນໍ້ານໍາໃຊ້ເຂົ້າໃນການອຸປະໂພກ ແລະ ບໍລິໂພກ, ການຜະລິດກະສິກໍາ ປູກຝັງ, ລ້ຽງສັດ, ຊົນລະປະທານ, ການປະມົງ, ອຸດສະຫະກໍາ, ຜະລິດໄຟຟ້າ, ການທ່ອງທ່ຽວ ແລະ ອື່ນໆ; (2) ສົມທົບ ກະຊວງກະສິກໍາ ແລະ ປ່າໄມ້ ແລະ ພາກສ່ວນທີ່ກ່ຽວຂ້ອງ ເພື່ອປົກປັກຮັກສາແຫຼ່ງນໍ້າ ໂດຍສະເພາະ ປ່າຍອດນໍ້າ ພ້ອມທັງຄົ້ນຄວ້ານໍາໃຊ້ທ່າແຮງຈາກນໍ້າ ເຂົ້າໃນການພັດທະນາເສດຖະກິດ-ສັງຄົມຢ່າງມີປະສິດທິຜົນ ແລະ ຍືນຍົງ; (3) ສຸມໃສ່ການຈັດຕັ້ງປະຕິບັດບັນດາແຜນຄຸ້ມຄອງອ່າງຮັບນໍ້າຂະໜາດໃຫຍ່ ທີ່ໄດ້ຮັບຮອງແລ້ວໃຫ້ມີປະສິດຜົນ ພ້ອມທັງສືບຕໍ່ສ້າງແຜນຄຸ້ມຄອງອ່າງນໍ້າຂະໜາດກາງໃຫ້ສໍາເລັດຕາມຄາດໝາຍ; (4) ຄຸ້ມຄອງໂຄງການ ແລະ ກິດຈະການຕ່າງໆ ບໍ່ໃຫ້ມີການປ່ອຍນໍ້າເປື້ອນລົງສູ່ແຫຼ່ງນໍ້າສາທາລະນະ, ປະສານສົມທົບກັບພາກສ່ວນກ່ຽວຂ້ອງສ້າງລະບົບບໍາບັດນໍ້າເປື້ອນຈາກຄົວເຮືອນ. ສໍາລັບ ວຽກງານອຸຕຸນິຍົມ, ອຸທົກກະສາດ ແລະ ກອງເລຂາຄະນະກໍາມະການແມ່ນໍ້າຂອງ ແຫ່ງຊາດ ກໍ່ໃຫ້ສືບຕໍ່ຈັດຕັ້ງປະຕິບັດຕາມພາລະບົດບາດ ໂດຍສະເພາະ ການຈັດຕັ້ງປະຕິບັດສັນຍາແມ່ນໍ້າຂອງ 1995, ການປະຕິບັດຂະບວນກາານປຶກສາຫາລື ກ່ຽວກັບ ການແຈ້ງໃຫ້ຮູ້ລ່ວງໜ້າ ເພື່ອຮັບປະກັນໃຫ້ການພັດທະນາໂຄງການພະລັງນໍ້າ ຕາມລໍາແມ່ນໍ້າຂອງ ໄດ້ຖືກຈັດຕັ້ງປະຕິບັດຕາມແຜນການ, ສືບຕໍ່ຂະຫຍາຍ ແລະ ສ້າງຕາໜ່າງອຸຕຸນິຍົມ ແລະ ອຸທົກກະສາດ ໃຫ້ກວມເອົາທຸກເຂດໃນທົ່ວປະເທດ ແລະ ຮັບປະກັນການບໍາລຸງຮັກສາໃຫ້ມີຄວາມຍືນຍົງ ແລະ ຫັນເປັນທັນສະໄໝ ເພື່ອຕອບສະໜອງໃນການລາຍງານສະພາບພະຍາກອນ ແລະ ແຈ້ງເຕືອນ ສະພາບອາກາດ, ລະດັບນໍ້າ ແລະ ແຜ່ນດິນໄຫວ ໃຫ້ສັງຄົມຮັບຊາບຢ່າງເປັນປົກກະຕິ, ມີຄວາມຊັດເຈນ ແລະ ທັນເຫດການຍິ່ງຂຶ້ນ ພ້ອມທັງຈັດຕັ້ງຜັນຂະຫຍາຍແຜນແມ່ບົດໃຫ້ມີປະສິດທິຜົນ;

5) ສໍາລັບ ວຽກງານອື່ນໆ ກໍ່ໃຫ້ສືບຕໍ່ຈັດຕັ້ງປະຕິບັດບັນດາຄາດໝາຍ ແລະ ວຽກງານຈຸດສຸມ ຂອງຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ ໂດຍສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃນທ້າຍສະໄໝ, ແຜນພັດທະນາເສດຖະກິດ-ສັງຄົມ ແຫ່ງຊາດ ປະຈໍາປີ 2025 ສົມທົບກັບການຈັດຕັ້ງປະຕິບັດ 2 ວາລະແຫ່ງຊາດ, ການປະຕິບັດເປົ້າໝາຍການພັດທະນາແບບຍືນຍົງ ແລະ ການເຕີບໂຕສີຂຽວທີ່ຕິດພັນກັບຄວາມຮັບຜິດຊອບຂອງ ຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ.

ທີ່ມາ: ໜ່ວຍຂ່າວ ກຊສ

• 

• 

• 

• 

• 

• 

ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ຈັດກອງປະຊຸມສະຫຼຸບການ ຈັດຕັ້ງປະຕິບັດວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳປີ 2024 ແລະ ທິດທາງແຜນການ ປີ 2025 ໃນລະຫວ່າງວັນທີ 30-31 ມັງກອນ 2025 ທີ່ຫ້ອງປະຊຸມໃຫຍ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍການເປັນປະທານ ຂອງ ທ່ານ ນາງ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຜູ້ເຂົ້າຮ່ວມກອງປະຊຸມ ປະກອບມີ: ບັນດາທ່ານຄະນະນໍາກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ; ປະທານ, ຮອງປະທານກຳມະທິການທີ່ກ່ຽວຂ້ອງຂອງສະພາແຫ່ງຊາດ, ປະທານສະຫະພັນກຳມະບານລາວ, ອົງການທຽບເທົ່າກະຊວງ; ບັນດາຮອງລັດຖະມົນຕີຂອງບັນດາກະຊວງ; ບັນດາທ່ານເຈົ້າແຂວງ, ຮອງເຈົ້າແຂວງ, ມີຫົວໜ້າຫ້ອງການ, ບັນດາທ່ານຫົວໜ້າກົມ, ຮອງຫົວໜ້າກົມ, ຮອງຫົວໜ້າຫ້ອງການ; ບັນດາທ່ານຫົວໜ້າພະແນກ, ຮອງຫົວໜ້າພະແນກ ແລະ ບັນດາທ່ານ ຫົວໜ້າຂະແໜງການ ຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ທົ່ວປະເທດ.

ພາຍຫຼັງ ທ່ານລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ປະທານກອງປະຊຸມ ໄດ້ກ່າວເປີດກອງປະຊຸມແລ້ວ ທ່ານ ພູວົງ ຫຼວງໄຊຊະນະ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ສະຫຼຸບຕີລາຄາການຈັດຕັ້ງປະຕິບັດແຜນພັດທະນາຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ ປະຈຳປີ 2024 ແລະ ທິດທາງ ປີ 2025 ໂດຍຍົກໃຫ້ ເຫັນຜົນງານທີ່ຍາດມາໄດ້ ພ້ອມທັງຕີລາຄາ ໃຫ້ເຫັນ ຈຸດດີ, ຈຸດອ່ອນຂໍ້ຄົງຄ້າງ, ສາເຫດຕ່າງໆ ແລະ ບົດຮຽນຖອດຖອນໄດ້ ໂດຍສະເພາະບັນຫາທີ່ພົ້ນເດັ່ນໃນການຈັດຕັ້ງປະຕິບັດວຽກງານທີ່ດິນ, ສິ່ງແວດລ້ອມ, ນໍ້າ ແລະ ຊັບພະຍາກອນນ້ຳ, ການປ່ຽນແປງດິນຟ້າອາກາດ, ອຸຕຸນິຍົມ ແລະ ອຸທົກກະສາດ. ຜ່ານການ ຈັດຕັ້ງປະຕິບັດຕົວຈິງ ແລະ ບົດຮຽນຖອດຖອນໄດ້ ໃນປີຜ່ານມາ ກໍ່ໄດ້ມີການກຳນົດທິດທາງ, ກົນໄກການຈັດຕັ້ງປະຕິບັດໃນຊຸມປີຕໍ່ໜ້າຢ່າງພາວະວິໃສ ແລະ ສອດຄ່ອງກັບສະພາບເງື່ອນໄຂຕົວຈິງ. ກອງປະຊຸມມື້ທີ່ໜຶ່ງນີ້ ຍັງໄດ້ຮັບຟັງການສະເໜີເນື້ອໃນຫຍໍ້ ຈາກບັນດາທ່ານຫົວໜ້າກົມພາຍໃນກະຊວງ ກ່ຽວກັບ ການຈັດຕັ້ງປະຕິບັດວຽກງານ ການຂຶ້ນທະບຽນອອກໃບຕາດິນ, ການເຊົ່າ ແລະ ສຳປະທານທີ່ດິນ, ການ ຄຸ້ມຄອງສິ່ງແວດລ້ອມ ໂຄງການລົງທຶນ ແລະ ກິນຈະການຕ່າງໆ, ການຈັດຕັ້ງປະຕິບັດແຜນຄຸ້ມຄອງອ່າງຮັບນ້ຳ, ການແກ້ໄຂບັນຫາການປ່ຽນແປງດິນຟ້າອາກາດ, ການຊື້-ຂາຍສິນເຊື່ອກາກບອນ, ການຈັດຕັ້ງປະຕິບັດວຽກງານຮັບຮູ້ສິດນຳໃຊ້ທີ່ດິນຂອງປະຊາຊົນທີ່ອາໃສ ແລະ ທຳການຜະລິດໃນເຂດທີ່ດິນປ່າໄມ້ ພ້ອມກັນ ນັ້ນ, ກອງປະຊຸມຍັງໄດ້ຮັບຟັງການປະກອບຄໍາເຫັນຂອງຜູ້ເຂົ້າຮ່ວມກອງປະຊຸມ ຈາກການນຳຂອງບັນດາ ກະຊວງ, ອົງການ ແລະ ອົງການປົກຄອງແຂວງ, ທຸກຄຳຄິດຄຳເຫັນ ລ້ວນແຕ່ສ່ອງແສງໃຫ້ເຫັນບັນຫາທີ່ພົ້ນເດັ່ນໃນການຈັດຕັ້ງປະຕິບັດຕົວຈິງ ພ້ອມທັງມີຂໍ້ສະເໜີແນະຕ່າງໆໃນການປັບປຸງແກ້ໄຂ ໃນການຈັດຕັ້ງປະຕິບັດວຽກງານຂອງຂະແໜງການຊັບພະຍາກອນທໍາມະຊາດ ແລະ ສິ່ງແວດ ລ້ອມ ໃຫ້ມີປະສິດທິພາບ.

ພິເສດໃນມື້ທີສອງ(ວັນທີ 31 ມັງກອນ 2025), ກອງປະຊຸມແມ່ນຈະໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາ ຈາກ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ເພື່ອເປັນເຂັມທິດເຍືອງທາງໃຫ້ແກ່ການປະຕິບັດວຽກງານຂະແໜງການຊັບພະຍາກອນທໍາມະຊາດ ແລະ ສິ່ງແວດລ້ອມ ໃນຊຸມປີຕໍ່ໜ້າ ອີກດ້ວຍ.

ແຫຼ່ງຂ່າວຈາກ: ໜ່ວຍຂ່າວ ກຊສ

• 

• 

• 

• 

• 

• 

• 

• 

• 

ໃນວັນທີ 23 ທັນວາ 2024 ຢູ່ທີ່ ສໍານັກງານ ກອງເລຂາ ຄະນະກໍາມາທິການແມ່ນໍ້າຂອງສາກົນ (ຄມສ) ທີ່ ນະຄອນຫຼວງວຽງຈັນ ໄດ້ມີພິທີສະເຫຼີມສະຫຼອງຂອງການເປັນທີ່ຕັ້ງ ສໍານັກງານ ກອງເລຂາ ຄມສ ຢູ່ ສປປ ລາວ ຄົບຮອບ 20 ປີ ແລະ ພິທີເປີດສູນການຮຽນຮູ້ ແລະ ຢ້ຽມຢາມ ຂອງ ກອງເລຂາ ຄມສ ຂຶ້ນ ຢ່າງເປັນທາງການ ໂດຍການໃຫ້ກຽດເຂົ້າຮ່ວມ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ, ມີ ທ່ານ ນາງ ບຸນຄຳ ວໍລະຈິດ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ), ປະທານຄະນະກຳມະການແມ່ນ້ຳຂອງແຫ່ງຊາດ (ຄມຊ)ພ້ອມດ້ວຍພະນັກງານຂັ້ນສູງ ຈາກບັນດາປະເທດ ສະມາຊິກ ຄະນະກຳມາທິການ ແມ່ນ້ຳຂອງສາກົນ ລວມມີ: ສປປ ລາວ, ໄທ, ຫວຽດນາມ, ກຳປູເຈຍ ແລະ ພະນັກງານ ຈາກ ກອງເລຂາ ຄະນະກຳມາທິການແມ່ນໍ້າຂອງສາກົນ, ເອກອັກຄະລັດທະທູດ ປະເທດ ຢີ່ປຸ່ນ, ສ ອາເມຣິກາ, ມໍຣົກໂຄ, ອົສຕຣາລີ ເຂົ້າຮ່ວມນຳ.

ໃນໂອກາດນີ້ ທ່ານ ນາງ ບຸນຄຳ ວໍລະຈິດ, ໄດ້ກ່າວມີຄຳເຫັນ ໃນນາມທີ່ເປັນ ປະທານ ສະພາມົນຕີ ຂອງ ຄມຊ ສຳລັບ ປີ 2024 ເຊິ່ງໄດ້ກ່າວວ່າ: ສະພາມົນຕີ ແລະ ຄະນະກຳມະການຮ່ວມ ຂອງ ຄມສ ໄດ້ນຳພາ-ຊີ້ນຳ ຢ່າງໃກ້ສິດ ໃຫ້ກອງເລຂາ ຂອງ ຄມສ ປະຕິບັດໜ້າທີ່ຂອງຕົນ ໃນການສະໜັບສະໜູນ ແລະ ອຳນວຍຄວາມສະດວກໃຫ້ ບັນດາປະເທດສະມາຊິກ ຄມສ ໃນການສົນທະນາ ປຶກສາຫາລື ແລະ ວາງແຜນການຄຸ້ມຄອງນ້ຳ ແລະ ຊັບພະຍາກອນນ້ຳ ໃນອ່າງແມ່ນໍ້າຂອງໃຫ້ມີຄວາມຍືນຍົງ. ນອກຈາກນັ້ນ ທ່ານ ຍັງໄດ້ກ່າວຕື່ມວ່າ ໃນນາມຕາງໜ້າໃຫ້ ປະເທດສະມາຊິກ ຄມສ ຂໍສະແດງຄວາມຂອບໃຈ ມາຍັງລັດຖະບານ ແຫ່ງ ສປປ ລາວ ທີ່ໄດ້ ໃນການສະໜັບສະໜູນ ແລະ ອູ້ມຊູ ການເຈົ້າພາບ ທີ່ຕັ້ງຂອງ ສໍານັກງານ ກອງເລຂາ ຄມສ ເຊິ່ງໄດ້ມີຜົນສຳເລັດຫຼາຍໆດ້ານ. ສຳລັບ ສູນການຮຽນຮຸ້ ແລະ ຢ້ຽມຢາມ ຂອງ ກອງເລຂາ ຄມສ ແມ່ນຈະເປັນບ່ອນສຶກສາຫາຄວາມຮູ້ທີ່ທັນສະໄໝ ເພື່ອໃຫ້ສາທາລະນະຊົນທົ່ວໄປ ໂດຍສະເພາະ ຄົນລຸ້ນໃໝ່ ທີ່ມີຄວາມສົນໃຈ ຮຽນຮູ້ ກ່ຽວກັບ ປະຫວັດການຮ່ວມມືໃນອ່າງແມ່ນໍ້າຂອງ ແລະ ສະພາບອ່າງແມ່ນໍ້າຂອງ ເຊິ່ງຈະເຮັດໃຫ້ ສາທາລະນະ ກໍ່ຄືບັນດາປະເທດສະມາຊິກ ໄດ້ມີຄວາມຮັບຮູ້ ແລະ ເຂົ້າໃຈ ກ່ຽວກັບ ຄວາມຍືນຍົງໃນອ່າງແມ່ນໍ້າຂອງຫຼາຍຂຶ້ນກວ່າເກົ່າ.

ໃນພິທີກ່າວເປີດ ທ່ານ ສອນໄຊ ສີພັນດອນ, ນາຍົກລັດຖະມົນຕີແຫ່ງ ສປປ ລາວ ໄດ້ກ່າວວ່າ "ພວກເຮົາມີຄວາມພູມໃຈ ທີ່ ສປປ ລາວ ແມ່ນໄດ້ຮັບກຽດເປັນເຈົ້າພາບ ທີ່ຕັ້ງ ສຳນັກງານ ກອງເລຂາ ຄມສ ມາເປັນເວລາ 20 ປີ ແລ້ວ ເຊິ່ງສຳນັກງານ ແຫ່ງນີ້ ໄດ້ປະກອບສ່ວນສຳຄັນເຂົ້າໃນວຽກງານການຮ່ວມມືໃນອ່າງແມ່ນ້ຳຂອງ, ການພົວພັນກັບຄູ່ຮ່ວມມືໃນພາກພື້ນ ແລະ ສາກົນ, ພ້ອມດຽວກັນນັ້ນ ໄລຍະຜ່ານມາ, ສປປ ລາວ ໄດ້ຕັ້ງໜ້າປະຕິບັດພັນທະ ຕາມສັນຍາແມ່ນໍ້າຂອງ ຢ່າງຕັ້ງໜ້າ ໂດຍສະເພາະ ການເປັນເຈົ້າພາບທາງດ້ານທີ່ຕັ້ງ ຂອງ ສໍານັກງານໃຫຍ່ ຂອງ ກອງເລຂາ ຄມສ ເຊິ່ງເປັນການສະແດງໃຫ້ເຫັນເຖິງຄຳໝັ້ນສັນຍາຂອງ ສປປ ລາວ ໃນການຊຸກຍູ້ການຮ່ວມມື ແລະ ການພັດທະນາແບບຍືນຍົງໃນອ່າງແມ່ນໍ້າຂອງ. ຕາງໜ້າໃຫ້ແກ່ ລັດຖະບານລາວ, ຂໍສະແດງຄວາມຂອບໃຈ ຕໍ່ປະເທດສະມາຊິກ ຄມສ ແລະ ຄູ່ຮ່ວມອື່ນໆ ທີ່ໄດ້ໃຫ້ຄວາມເຊືື່ອໝັ້ນ ຕໍ່ລັດຖະບານລາວ ໃນການເປັນເຈົ້າພາບທີ່ຕັ້ງຂອງສໍານັກງານແຫ່ງນີ້. ນອກຈາກນັ້ນ ທ່ານນາຍົກລັດຖະມົນຕີ ຍັງກ່າວອີກວ່າ ສູນການຮຽນຮຸ້ ແລະ ຢ້ຽມຢາມ ຂອງ ກອງເລຂາ ຄມສ ແຫ່ງນີ້ ຖືເປັນສັນຍາລັກຂອງການຮ່ວມມືຂອງປະເທດສະມາຊິກ ຄມສ ອັນຈະເປັນສູນກາງແຫ່ງການແບ່ງປັນຄວາມຮູ້ ແລະ ການຮຽນຮູ້ ກ່ຽວກັບ ແມ່ນໍ້າຂອງ".

ສູນການສຶກສາ ແລະ ຢ້ຽມຢາມ ຂອງ ຄມສ ສ້າງຂຶ້ນເພື່ອເປັນບ່ອນສະແດງເຖິງປະຫວັດຄວາມເປັນມາ ຂອງການຮ່ວມມືແມ່ນໍ້າຂອງ ໃນດ້ານການພັດທະນາຊັບພະຍາກອນນ້ຳ ເຊິ່ງປະກອບດ້ວຍ ແບບຈຳລອງທາງກາຍຍະພາບ, ປຶ້ມປະຫວັດ ແລະບົດສຶກສາຕ່າງໆ, ແຜນທີ່ ກ່ຽວກັບ ແມ່ນໍ້າຂອງ ແລະ ຫ້ອງຄວບຄຸມສະຖານະການ ທີ່ມີເຄື່ອງມືຕິດຕາມກວດກາ ຊັບພະຍາກອນນໍ້າ ທີ່ທັນສະໄໝ ເຊິ່ງ ຜູ້ມາຢ້ຽມຢາມ ຈະໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບ ອະດີດ, ປະຈຸບັນ ແລະ ອະນາຄົດ ຂອງອ່າງແມ່ນ້ຳຂອງ. ນອກຈາກນັ້ນ, ສູນດັ່ງກ່າວນີ້ ຍັງຈະມີການຈັດຫຼັກສູດການສຶກສາ ສໍາລັບນັກວິຊາການ, ນັກຄົ້ນຄວ້າ, ນັກສຶກສາ ແລະ ປະຊາຊົນທົ່ວໄປ ເພື່ອສົ່ງເສີມຄວາມຮັບຮູ້ ກ່ຽວກັບ ຄວາມສໍາຄັນຂອງແມ່ນໍ້າຂອງ ແລະ ວຽກງານຂອງ ຄມສ ທີ່ກໍາລັງດໍາເນີນຢູ່. ຄຽງຄູ່ກັບການເປີດສູນດັ່ງກ່າວນັ້ນ, ກອງເລຂາ ຄມສ ຍັງໄດ້ເປີດຕົວ ແອັບວັນແມ່ຂອງ (One Mekong) ເຊິ່ງເປັນເຄື່ອງມືທີ່ສະໜອງຂໍ້ມູນການຕິດຕາມ ແລະ ການພະຍາກອນນໍ້າ ແບບທັນເວລາ ໃຫ້ກັບປະຊາຊົນໄດ້ຮັບຮູ້.ໃນໂອກາດດຽວກັນ, ທ່ານ ປອ. ອານຸລັກ ກິດຕິຄຸນ, ຫົວໜ້າກອງເລຂາ ຄມສ ໄດ້ເນັ້ນໜັກເຖິງ ພາລະກິດອັນກວ້າງຂວາງ ຂອງສູນແຫ່ງນີ້, ໂດຍກ່າວວ່າ: “ສູນແຫ່ງນີ້ ບໍ່ພຽງແຕ່ເປັນຈຸດໃຈກາງຂອງພາລະກິດ ຂອງ ຄມສ ເທົ່ານັ້ນ ແຕ່ຍັງເປັນຂົວຕໍ່ ແລະ ເຊື່ອມຕໍ່ ຂໍ້ມູນ ເຂົ້າກັບການຕັດສິນໃຈ, ເຊື່ອມຕໍ່ຄວາມຮູ້ ເຂົ້າກັບການປະຕິບັດ ແລະ ເຊື່ອມຕໍ່ປະຊາຊົນ ເຂົ້າກັບຈຸດປະສົງ. ຜູ້ຢ້ຽມຢາມ ບໍ່ພຽງແຕ່ຈະເຫັນເຖິງ ຜົນງານຜ່ານມາ ແລະ ການປະກອບສ່ວນຂອງ ຄມສ ແຕ່ຍັງຈະເຫັນເຖິງ ພະລັງຂອງຂໍ້ມູນ, ວິທະຍາສາດ ແລະ ການມີສ່ວນຮ່ວມຂອງຊຸມຊົນ ໃນການປະຕິບັດງານຜ່ານ ຫ້ອງຄວບຄຸມສະຖານະການ ແລະ ແອັບວັນແມ່ຂອງ. ຂໍໃຫ້ສະຖານທີ່ແຫ່ງນີ້ ເປັນການສະເຫຼີມສະຫຼອງ ອະດີດ ແລະ ປະຈຸບັນຂອງພວກເຮົາ ແລະ ສ້າງຄວາມຮັບຮູ້ເຖິງ ຄວາມຮີບດ່ວນໃນການສ້າງຄວາມແຕກຕ່າງ ໃຫ້ແກ່ອະນາຄົດຂອງແມ່ນ້ຳຂອງ”.

ແຫຼ່ງຂ່າວຈາກ ກຊສ

• 

• 

• 

• 

• 

• 

• 

• 

• 

• 

• 

• 

• 

• 

• 

ໃນລະຫວ່າງວັນທີ 10-12 ທັນວາ 2024 ທີ່ ຜ່ານມາ, ທ່ານ ນາງ ບຸນຄຳ ວໍລະຈິດ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ), ປະທານຄະນະກຳມະການແມ່ນ້ຳຂອງແຫ່ງຊາດ ພ້ອມດ້ວຍພະນັກງານຂັ້ນສູງ ຈາກບັນດາປະເທດ ສະມາຊິກ ຄະນະກຳມາທິການ ແມ່ນ້ຳຂອງສາກົນ ລວມມີ: ສປປ ລາວ, ໄທ, ຫວຽດນາມ, ກຳປູເຈຍ ແລະ ກອງເລຂາ ຄະນະກຳມາທິການແມ່ນໍ້າຂອງສາກົນ ໄດ້ເຂົ້າຮ່ວມ ຢ້ຽມຢາມ ແລະ ແລກປ່ຽນບົດຮຽນ ລະຫວ່າງ ຄະນະກຳມາທິການແມ່ນ້ຳຂອງສາກົນ ແລະ ຄະນະກຳມາທິການແມ່ນໍ້າມິດຊີຊິບປີ່ ຄັ້ງທີ 12 (𝟭𝟮𝘁𝗵 𝗠𝗲𝗸𝗼𝗻𝗴-𝗠𝗶𝘀𝘀𝗶𝘀𝘀𝗶𝗽𝗽𝗶 𝗦𝗶𝘀𝘁𝗲𝗿 𝗥𝗶𝘃𝗲𝗿𝘀 𝗘𝘅𝗰𝗵𝗮𝗻𝗴𝗲) ຢູ່ທີ່ ປະເທດສະຫະລັດອາເມລິກາ.

ການຢ້ຽມຢາມແລກປ່ຽນບົດຮຽນໃນຄັ້ງນີ້ ແມ່ນເປັນການປະຕິບັດ ຕາມບົດບັນທຶກ ວ່າດ້ວຍ ການຮ່ວມມື ລະຫວ່າງ ຄະນະກຳມາທິການແມ່ນ້ຳຂອງສາກົນ ແລະ ຄະນະກຳມາທິການແມ່ນໍ້າມິດຊີຊິບປີ່ (MOU) ທີ່ໄດ້ລົງນາມໃນປີ 2010 ໂດຍໄດ້ກຳນົດໃຫ້ ສອງຄະນະກຳມາທິການ ໄດ້ຮ່ວມມືກັນ ໃນການແກ້ໄຂສິ່ງທ້າທາຍຕ່າງໆໃນການຄຸ້ມຄອງອ່າງແມ່ນ້ໍາເປັນຕົ້ນແມ່ນ: ໄພພິບັດ, ການປ່ຽນແປງດິນຟ້າອາກາດ, ການຄຸ້ມຄອງ ແລະ ພັດທະນາຊັບພະຍາກອນນ້ຳ ແລະ ການຮ່ວມມືໃນພາກພື້ນ ເຊິ່ງແຕ່ລະປີ ກໍ່ໄດ້ມີການຜັດປ່ຽນກັນຢ້ຽມຢາມເຊິ່ງກັນແລະກັນ ແລະ ໄດ້ປະຕິບັດກັນມາໄດ້ 12 ປີແລ້ວ ປີນີີ້ເປັນຄັ້ງທີ 12. ເຊິ່ງສຳລັບການເຂົ້າຮ່ວມ ໃນຄັ້ງນີ້, ທ່ານ ນາງ ບຸນຄຳ ວໍລະຈິດ, ລັດຖະມົນຕີ ກຊສ ໄດ້ເຂົ້າຮ່ວມ ໃນນາມທີ່ເປັນປະທານສະພາມົນຕີ ຂອງ ຄະນະກຳມາທິການແມ່ນໍ້າຂອງສາກົນ ສຳລັບປີ 2024.

ໃນໂອກາດດັ່ງກ່າວນີ້ ທ່ານ ລັດຖະມົນຕີ ກຊສ ພ້ອມດ້ວຍຄະນະ ກໍ່ໄດ້ໄປຢ້ຽມຢາມ ແລະ ທັດສະນະສຶກສາ ທີ່: ອ່າງແມ່ນໍ້າ ກຳເບີແລນ (Cumberland River) ເພື່ອສຶກສາເບິ່ງການຄຸ້ມຄອງອ່າງແມ່ນ້້ຳ ເປັນຕົ້ນແມ່ນ ການຄຸ້ມຄອງຄຸນນະພາບນ້ຳ ແລະ ການບຳບັດນ້ຳເປື້ອນໃນຕົວເມືອງ, ທັດສະນະສຶກສາ ຄອງເດີນເຮືອ ເຄັນຕັກກີ (Kentucky lock) ແລະ ເຂື່ອນບາກລີ (Barkly Dam) ເຊິ່ງຕັ້ງຢູ່ໃນອ່າງແມ່ນໍ້າ ກຳເບີແລນ (Cumberland River) ຢູ່ທີ່ລັດ ເທັນນເສຊີ (Tennessee) ເຊືິິ່ງເປັນເຂື່ອນອະເນກປະສົງ ທີ່ອອກແບບມາສຳລັບຫຼາຍວັດຖຸປະສົງ ເປັນຕົ້ນແມ່ນ ຜະລິດກະແສໄຟຟ້າ, ການພັກຜ່ອນ-ທ່ອງທ່ຽວ, ການປ້ອງກັນໄພນ້ຳຖ້ວມ ແລະ ການເດີນເຮືອ. ນອກຈາກນັ້ນ ຍັງໄດ້ໄປ ຢ້ຽມຢາມ ສູນບັນຊາການ ການເດີນເຮືອ (Caven Point) ທີ່ ນະຄອນນິວຢອກ (New York) ເພື່ອສຶກສາ ແລະ ແລກປ່ຽນບົດຮຽນກ່ຽວກັບ ການຕິດຕາມ ແລະ ການສຶກສາຄົ້ນຄວ້າ ກ່ຽວກັບ ການເດີນເຮືອ, ການຄຸ້ມຄອງໄພນ້ຳຖ້ວມ, ການປົກປັກຮັກສາສິ່ງແວດລ້ອມ, ການສືບຢັ່ງທາງໄກ, ການຕິດຕາມສະພາບອຸທົກກະສາດ ແລະ ການຟື້ນຟູສະພາບຊີວະນາໆພັນ ແລະ ນິເວດວິທະຍາ ໃນເຂດຊາຍຝັ່ງປາກແມ່ນໍ້າ ຮຸດຊັນ (Hudson) ທີ່ໄຫຼປ່ອງໃສ່ ມະຫາສະໝຸດ ແອດແລນຕິກ.

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

ກອງປະຊຸມ ສະພາມົນຕີ ຄະນະກຳມາທິການແມ່ນໍ້າຂອງສາກົນ (ຄມສ) ແມ່ນກອງປະຊຸມ ປະຈຳປີ ໃນລະດັບ ຂັ້ນລັດຖະມົນຕີ ຂອງບັນດາປະເທດສະມາຊິກ ຄະນະກຳມາທິການແມ່ນໍ້າຂອງສາກົນ ເຊິ່ງປະກອບມີ ສປປ ລາວ, ສສ ຫວຽດນາມ, ກຳປູເຈຍ ແລະ ໄທ. ສຳລັບ ກອງປະຊຸມສະພາມົນຕີ ຄະນະກຳມາທິການແມ່ນໍ້າຂອງສາກົນ ປະຈຳປີ ຄັ້ງທີ 31 ແລະ ກອງປະຊຸມສະພາມົນຕີ ຄມສ ຮ່ວມກັບບັນດາປະເທດຄູ່ຮ່ວມພັດທະນາ ຄັ້ງທີ 29 ໄດ້ຈັດຂຶ້ນໃນວັນທີ 27 ພະຈິກ 2024 ທີ່ ໂຮງແຮມ ພູລແມນ, ນະຄອນຫຼວງພະບາງ, ແຂວງຫຼວງພະບາງ, ໂດຍການເປັນປະທານຂອງ ທ່ານ ນາງ ບຸນຄຳ ວໍລະຈິດ, ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ), ປະທານຄະນະກຳມະການແມ່ນ້ຳຂອງແຫ່ງຊາດ ແລະ ປະທານສະພາມົນຕີ ຄະນະກຳມາທິການແມ່ນ້ຳຂອງສາກົນ ປະຈຳປີ 2024.

ໃນກອງປະຊຸມຄັ້ງນີ້ ໄດ້ໃຫ້ກຽດກ່າວຕ້ອນຮັບຄະນະ ຜູ້ແທນທີ່ເຂົ້າຮ່ວມກອງປະຊຸມ ໂດຍທ່ານ ນາງ ສີລິພອນ ສຸພັນທອງ, ຮອງເຈົ້າແຂວງຫຼວງພະບາງ ແລະ ການເຂົ້າຮ່ວມຂອງ ຄະນະຜູ້ແທນທີ່ເປັນສະມາຊິກສະພາມົນຕີ ຈາກປະເທດສະມາຊິກ ຄມສ, ເຊິ່ງປະກອບມີ ຣາຊະອານາຈັກກຳປູເຈຍ, ສປປ ລາວ, ຣາຊະອານາຈັກໄທ ແລະ ສສ. ຫວຽດນາມ, ປະເທດຄູ່ຮ່ວມເຈລະຈາ (ສປ ຈີນ ແລະ ມຽນມາ), ບັນດາປະເທດຄູ່ຮ່ວມພັດທະນາ, ຊ່ຽວຊານ ແລະ ວິຊາການຈາກກອງເລຂາ ຄມສ ທັງໝົດປະມານ 150 ກວ່າທ່ານ. ສຳລັບຄະນະຜູ້ແທນຈາກ ສປປ ລາວ ປະກອບມີ ທ່ານ ຈັນທະເນດ ບົວລະພາ, ຮອງລັດຖະມົນຕີ ກຊສ, ຮອງປະທານຄະນະກຳມະການແມ່ນໍ້າຂອງແຫ່ງຊາດ, ສະມາຊິກສຳຮອງ ສະພາມົນຕີ ຄມສ ສຳລັບ ສປປ ລາວ, ທ່ານ ຈັນທະບູນ ສຸກອາລຸນ, ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ພອນປະເສີດ ພູລິພັນ, ຫົວໜ້າກອງເລຂາ ຄະນະກຳມະການແມ່ນໍ້າຂອງແຫ່ງຊາດ ພ້ອມດ້ວຍຜູ້ຕາງໜ້າຈາກ ກະຊວງການຕ່າງປະເທດ, ແລະ ກະຊວງພະລັງງານ ແລະ ບໍ່ແຮ່ ແລະ ຈາກ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເຂົ້າຮ່ວມນຳ.

ຈຸດປະສົງຫຼັກຂອງກອງປະຊຸມ ຄັ້ງນີ້ ແມ່ນເພື່ອ 1) ທົບທວນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ກຳນົດທິດທາງແຜນການຂອງ ຄມສ ໃນຕໍ່ໜ້າ; 2) ພິຈາລະນາອະນຸມັດເອກະສານສຳຄັນຈຳນວນໜຶ່ງຂອງ ຄມສ ແລະ 3) ປຶກສາຫາລືກັບຄູ່ຮ່ວມພັດທະນາ ກ່ຽວກັບແຜນການຮ່ວມມືໃນຕໍ່ໜ້າ ແລະ ວຽກງານອື່ນໆທີ່ກ່ຽວຂ້ອງ ກັບ ການພັດທະນາອ່າງແມ່ນໍ້າຂອງ.

ໃນກອງປະຊຸມ, ຄັ້ງນີ້ ທ່ານ ນາງ ບຸນຄຳ ວໍລະຈິດ, ລັດຖະມົນຕີ ກຊສ, ປະທານຄະນະກຳມະການແມ່ນ້ຳຂອງແຫ່ງຊາດ ແລະ ປະທານສະພາມົນຕີຄະນະກຳມາທິການແມ່ນ້ຳຂອງສາກົນ ປີ 2024 ໃນນາມປະທານກອງປະຊຸມ ໄດ້ກ່າວເປີດກອງປະຊຸມຢ່າງເປັນທາງການ ໂດຍໄດ້ ສະແດງຄວາມຍິນດີຕ້ອນຮັບບັນດາແຂກທີ່ມາເຂົ້າຮ່ວມກອງປະຊຸມ ເຊິ່ງບາງຕອນຂອງບົດກ່າວ ຂອງທ່ານລັດຖະມົນຕີ ກຊສ ຍັງໄດ້ ຍົກໃຫ້ເຫັນເຖິງຄວາມໝາຍ ແລະ ຄວາມສຳຄັນຂອງ ແມ່ນໍ້າຂອງ ແລະ ສັນຍາແມ່ນໍ້າຂອງປີ 1995 ຕໍ່ການຮ່ວມມື ແລະ ການພັດທະນາອ່າງແມ່ນໍ້າຂອງຕາມທິດຍືນຍົງ ເພື່ອຄວາມສົມບູນພູນສຸກຂອງປະຊາຊົນທີອາໄສຢູ່ລຽບຕາມແມ່ນໍ້າຂອງ. ນອກຈາກນັ້ນ ກໍ່ຍັງໄດ້ຍ້ອງຍໍຊົມເຊີຍ ແລະ ສະແດງຄວາມຂອບໃຈ ບັນດາປະເທດສະມາຊິກ ຄມສ, ຄູ່ຮ່ວມເຈລະຈາ, ຄູ່ຮ່ວມພັດທະນາ ແລະ ກອງເລຂາ ຄມສ ທີ່ໄດ້ໃຫ້ການຮ່ວມມື ແລະ ສະໜັບສະໜູບ ໃນການຈັດຕັ້ງປະຕິບັດວຽກງານຂອງ ຄະນະກຳທິການແມ່ນໍ້າຂອງສາກົນຕະຫຼອດມາ. ໃນຕອນທ້າຍ ທ່ານລັດຖະມົນຕີ ຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມກອງປະຊຸມຈົ່ງຕັ້ງໜ້າເຂົ້າຮ່ວມ ແລະ ປະກອບຄຳເຫັນໃສ່ບັນດາຫົວຂໍ້ຕ່າງໆຂອງກອງປະຊຸມຢ່າງຈິງຈັງ ເພື່ອເປັນແນວທາງໃນການພັດທະນາອ່າງແມ່ນໍ້າຂອງໃຫ້ມີຄວາມຍືນຍົງ.

ກອງປະຊຸມ ຄັ້ງນີ້, ບັນດາ ສະມາຊິກສະພາມົນຕີ ຄະນະກໍາມາທິການແມ່ນໍ້າຂອງສາກົນ ໄດ້ພ້ອມກັນປຶກສາຫາລື ແລະ ພິຈາລະນາຮັບຮອງເອົາເອກະສານສຳຄັນຈຳນວນໜຶ່ງ ເປັນຕົ້ນແມ່ນ: ອະນຸມັດແຜນວຽກປະຈໍາປີ 2025-2026 ຂອງຄະນະກຳມາທິການແມ່ນໍ້າຂອງສາກົນ, ຮັບຮອງເອົາຫົວໜ້າບໍລິຫານ ກອງເລຂາ ຄະນະກຳມາທິການແມ່ນໍ້າຂອງສາກົນ ຄົນໃໝ່ (CEO of the MRCS) ຊຶ່ງເປັນຮອບວຽນຂອງ ຣາຊາອານາຈັກ ໄທ ທີ່ຈະດຳລົງຕຳແໜ່ງດັ່ງກ່າວໃນໄລຍະເວລາ 3 ປີ (2025 – 2027) ຕາມຜົນການຄັດເລືອກແບບເປີດກວ້າງ. ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າ ແລະ ທົບທວນການຈັດຕັ້ງປະຕິບັດວຽກງານໃນໄລຍະຜ່ານມາ ຈາກກອງເລຂາຄະນະກຳມາທິການແມ່ນໍ້າຂອງສາກົນ ແລະ ທິດທາງແຜນການວຽກງານໃນຕໍ່ໜ້າຂອງຕົນເຊັ່ນ: ຍຸດທະສາດການພັດທະນາອ່າງແມ່ນໍ້າຂອງ ຮອດປີ 2030, ການຈັດຕັ້ງປະຕິບັດບັນດາລະບຽບການ ຂອງ ຄມສ ແລະ ວຽກງານອື່ນໆ ຈຳນວນໜຶ່ງ. ພ້ອມດຽວກັນນັ້ນ, ກອງປະຊຸມຍັງໄດ້ປຶກສາຫາລື ແລະ ຊຸກຍູ້ບັນດາປະເທດຄູ່ຮ່ວມພັດທະນາ ພິຈາລະນາສືບຕໍ່ໃຫ້ການສະໜັບສະໜູນແກ່ຄະນະກໍາມາທິການແມ່ນໍ້າຂອງສາກົນໃນຕໍ່ໜ້າ ເພື່ອຈັດຕັ້ງປະຕິບັດບັນດາກິດຈະກຳທີ່ຖືກຮັບຮອງໃນແຜນວຽກໃນສົກປີ 2025-2026 ໃຫ້ໄດ້ຮັບຜົນດີ ແລະ ມີປະສິດທິຜົນສູງ

ຂ່າວໂດຍ: ໜ່ວຍຂ່າວ ກຊສ

• 

• 

• 

• 

• 

• 

ໃນວັນທີ 3 ຕຸລາ 2024, ກອງເລຂາຄະນະກຳມະການແມ່ນ້ຳຂອງແຫ່ງຊາດ (ກຄມຊ), ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ຈັດກອງປະຊຸມສະຫຼຸບການຈັດຕັ້ງໂຄງການຄຸ້ມຄອງພື້ນທີ່ຄວາມສ່ຽງໄພນໍ້າຖ້ວມລຽບຕາມແມ່ນໍ້າຂອງພາຍໃຕ້ການຊ່ວຍເຫຼືອລ້າ ຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ທີ່ ເມືອງຊະນະສົມບູນ ແຂວງຈຳປາສັກ ໂດຍໃຫ້ກຽດເປັນປະທານຮ່ວມຂອງ ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ ແລະ ທ່ານ ຈັນທະເນດ ບົວລະພາ ຮອງລັດຖະມົນຕີ ກຊສ, ມີທ່ານຫົວໜ້າກົມ, ທ່ານເຈົ້າເມືອງ, ທ່ານຫົວໜ້າພະແນກການທີ່ກ່ຽວຂ້ອງ ແລະ ບັນດາແຂກ ທີ່ຖືກເຊີນເຂົ້າຮ່ວມ. ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສະຫຼຸບການຈັດຕັ້ງປະຕິບັດໂຄງການ ການຄຸ້ມຄອງພື້ນທີ່ຄວາມສ່ຽງໄພນໍ້າຖ້ວມຢູ່ລຽບຕາມລໍາແມ່ນໍ້າຂອງ ພ້ອມທັງ ຈັດພິທີ ການມອບ-ຮັບໂຄງການກໍ່ສ້າງ ຫ້ອງນໍ້າ ທີ່ ບ້ານໜອງຫີນ, ເມືອງຄົງເຊໂດນ, ແຂວງສາລະວັນ ແລະ ໂຄງການກໍ່ສ້າງສູນຫຼົບໄພພິບັດນ້ຳຖ້ວມ ທີ່ ບ້ານຄີລີ, ເມືອງຊະນະສົມບູນ, ແຂວງຈໍາປາສັກ.

ໃນທີ່ປະຊຸມ ທ່ານ ພອນປະເສີດ ພູລິພັນ ຫົວໜ້າ ກຄມຊ ໄດ້ລາຍງານຕໍ່ທີ່ປະຊຸມວ່າ ໂຄງການຄຸ້ມຄອງຄວາມສ່ຽງໄພນໍ້າຖ້ວມລຽບຕາມແມ່ນໍ້າຂອງ ແມ່ນໂຄງການໜຶ່ງ ຂອງກອບການຮ່ວມມືແມ່ນ້ຳຂອງ-ແມ່ນ້ຳ ລ້ານຊ້າງ ໂດຍແມ່ນລັດຖະບານຂອງ ສາທາລະນະລັດ ປະຊາຊົນຈີນ ເປັນຜູ້ໃຫ້ງົບປະມານ ໂດຍຜ່ານກອງທຶນພິເສດ ເຊີ່ງໄດ້ເລີ່ມຈັດຕັ້ງປະຕິບັດມາແຕ່ປີ 2022 ເປັນຕົ້ນມາ. ຈຸດປະສົງຂອງໂຄງການດັ່ງກ່າວ ແມ່ນເພື່ອວາງກົນໄກຫຼຸດຜ່ອນຜົນກະທົບ ແລະ ຄວາມອ່ອນໄຫວ (ແນວໂນ້ມ) ຈາກໄພນໍ້າຖ້ວມ ໃນປະຈຸບັນ ແລະ ອານາຄົດ ໂດຍອີງໃສ່ມາດຕະການປັບຕົວໃນພື້ນທີ່ ທີ່ມີຄວາມສ່ຽງໄພນໍ້າຖ້ວມ. ໃນນັ້ນ, ຈຸດປະສົງສະເພາະ ແມ່ນເພື່ອ 1) ສ້າງຕົວແບບຈຳລອງອຸທົກກະສາດ ແລະ ຊົນລະສາດ; 2) ສ້າງແຜນທີ່ນໍ້າຖ້ວມ ແລະ ປະເມີນຜົນກະທົບ ແລະ ຄວາມອ່ອນໄຫວຈາກໄພນໍ້າຖ້ວມ; 3) ກຳນົດ ແລະ ວາງບູລິມະສິດພື້ນທີ່ ທີ່ມີຄວາມສ່ຽງ ແລະ ຄວາມອ່ອນໄຫວຕໍ່ກັບໄພນໍ້າຖ້ວມ; 4) ກຳນົດມາດຕະການທາງດ້ານໂຄງສ້າງ ແລະ ດ້ານນະໂຍບາຍ ກ່ຽວກັບການປັບຕົວເຂົ້າກັບເຂົ້າໄພນໍ້າຖ້ວມ ໂດຍຜ່ານການຈັດຕັ້ງປະຕິບັດມາດຕະການປັບຕົວທີ່ເໝາະສົມໃນເຂດພື້ນທີ່ນໍ້າຖ້ວມທີ່ຖືເປັນບູລິມະສິດ.ຕະຫຼອດໄລຍະການຈັດຕັ້ງປະຕິບັດໂຄງການ ແຕ່ປີ 2022 ເປັນຕົ້ນມາ ໂຄງການດັ່ງກ່າວ ໄດ້ເລີ່ມຈາກການສ້າງຕົວແບບຈໍາລອງ ເພື່ອຈໍາລອງສະພາບນໍ້າຖ້ວມ ຈົນຮອດ ການລະບຸບ້ານທີ່ມີຄວາມສ່ຽງຕໍ່ໄພນ້ຳຖ້ວມ ຕາມລໍາແມ່ນໍ້າຂອງ. ຫຼັງຈາກກຳນົດບ້ານທີ່ມີ ຄວາມສ່ຽງໄດ້ແລ້ວ, ກໍ່ໄດ້ມີການລົງປະເມີນຄວາມຕ້ອງການຮ່ວມກັບອໍານາດການປົກຄອງຂັ້ນແຂວງ ແລະ ເມືອງ. ໂດຍອີງຕາມຜົນການຈໍາລອງນໍ້າຖ້ວມ ໃນອ່າງຮັບນໍ້າເຊໂດນ, ເຫັນໄດ້ວ່າ ເມືອງຄົງເຊໂດນ, ແຂວງສາລະວັນ ແລະ ເມືອງຊະນະສົມບູນ ແຂວງຈໍາປາສັກ ຖືເປັນເມືອງທີ່ໄດ້ຮັບຜົນກະທົບຫຼາຍກວ່າໝູ່ ໃນນັ້ນ, ຢູ່ເມືອງຄົງເຊໂດນ ໄດ້ຄັດເລືອກເອົາ ບ້ານໜອງຫີນ ແລະ ຢູ່ເມືອງຊະນະສົມບູນ ໄດ້ຄັດເລືອກເອົາບ້ານຄີລີ ເຊີ່ງມາດຕະການທີ່ທາງອົງການປົກຄອງເມືອງ ຂອງທັງສອງເມືອງ ແລະ ສອງແຂວງ ເຫັນວ່າມີຄວາມຈຳເປັນທີ່ສຸດ ກໍ່ຄືທີ່ພັກອາໄສຊົ່ວຄາວສຳລັບຜູ້ປະສົບໄພ ພ້ອມກັບລະບົບສາທາລະນຸປະໂພກຈໍານວນໜຶ່ງ. ດັ່ງນັ້ນ, ໂຄງການ ຈຶ່ງໄດ້ມີການປະເມີນ ແລະ ຕົກລົງເຫັນດີສະໜັບສະໜູນສ້າງສູນຫຼົບໄພພິບັດ ພ້ອມດ້ວຍຫ້ອງນໍ້າ ແລະ ການຕິດຕັ້ງໄຟຟ້າຮັບໃຊ້ ຈໍານວນ 01 ຫຼັງ ຂະໜາດຄວາມກ້ວາງ (10x20 ແມັດ) ຢູ່ບ້ານຄີລີ, ເມືອງຊະນະສົມບູນ, ແຂວງຈໍາປາສັກ; ພ້ອມທັງ ສ້າງຫ້ອງນໍ້າ ພ້ອມດ້ວຍການຕິດຕັ້ງໄຟຟ້າຮັບໃຊ້ ຈໍານວນ 01 ຫຼັງ ຢູ່ບ້ານພູນາລາວ ຄຸ້ມໜອງຫີນ, ເມືອງຄົງເຊໂດນ, ແຂວງສາລະວັນ. ທັງສອງພື້ນຖານໂຄງລ່າງ ດັ່ງກ່າວ ຖືເປັນການປະກອບສ່ວນໃນການຮັບມື ແລະ ຕອບໂຕ້ໄພນໍ້າຖ້ວມ.ຫຼັງຈາກນັ້ນ ກໍໄດ້ມີການຈັດພິທີມອບ-ຮັບໂຄງການກໍ່ສ້າງ ຫ້ອງນໍ້າ ບ້ານໜອງຫີນ, ເມືອງຄົງເຊໂດນ, ແຂວງສາລະວັນ ແລະ ໂຄງການກໍ່ສ້າງສູນຫຼົບໄພພິບັດ ບ້ານຄີລີ, ເມືອງຊະນະສົມບູນ, ແຂວງຈໍາປາສັກ ຕາງໜ້າມອບໂດຍ ທ່ານ ພອນປະເສີດ ພູລິພັນ ຫົວໜ້າ ກຄມຊ ແລະ ຮັບໂດຍ ຕາງໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງສາລະວັນ ແລະ ແຂວງຈຳປາສັກ ຕາມລຳດັບ . ນອກຈາກນັ້ນ ກຄມຊ ໃນນາມຜູ້ຈັດຕັ້ງປະຕິບັດໂຄງການຮ່ວມ ຍັງໄດ້ມອບແຜນທີ່ນໍ້າຖ້ວມ ໃຫ້ແກ່ອົງການປົກຄອງທັງສອງເມືອງ (ເມືອງຄົງເຊໂດນ ແຂວງສາລະວັນ ແລະ ເມືອງຊະນະສົມບູນ ແຂວງຈຳປາສັກ) ຕື່ມອີກ ເພື່ອນໍາໄປໃຊ້ໃນການວາງແຜນຕອບໂຕ້ໄພນ້ຳຖ້ວມໃນຂັ້ນຕໍ່ໄປ.

• 

• 

• 

• 

ໃນໂອກາດກອງປະຊຸມ ເວທີສົນທະນາ ຂັ້ນລັດຖະມົນຕີ ຂອງບັນດາປະເທດສະມາຊິກອາຊຽນ ແລະ ສະມາຊິກ ຄະນະກຳມາທິການແມ່ນໍ້າຂອງສາກົນ(ຄມສ) ຄັ້ງທີ II ເຊິ່ງຈັດຂຶ້ນຢູ່ ນະຄອນຫຼວງວຽງຈັນ ໃນວັນທີ 18 ກັນຍາ 2024, ທ່ານ ປອ ນ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ສປປ ລາວ ປະທານຄະນະກຳມະການແມ່ນ້ຳຂອງແຫ່ງຊາດ ແລະ ປະທານສະພາມົນຕີຄະນະກຳມາທິການແມ່ນ້ຳຂອງສາກົນ ປີ 2024 ໄດ້ພົບປະສອງຝ່າຍ ກັບ ທ່ານ ຄິນ ມ່ອງ ຍີ, ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ການອະນຸລັກສິ່ງແວດລ້ອມ ແຫ່ງ ສາທາລະນະລັດ ສະຫະພາບ ມຽນມາ ເພື່ອປຶກສາຫາລື ແລະ ສືບຕໍ່ຊຸກຍູ້ການພົວພັນຮ່ວມມື ໃນຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ກໍ່ຄືແນໃສ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງ ໃຫ້ມີບາດກ້າວຂະຫຍາຍຕົວຍິ່ງຂຶ້ນ.

• 

• 

• 

• 

ໃນໂອກາດກອງປະຊຸມ ເວທີສົນທະນາ ຂັ້ນລັດຖະມົນຕີ ຂອງບັນດາປະເທດສະມາຊິກອາຊຽນ ແລະ ສະມາຊິກ ຄະນະກຳມາທິການແມ່ນໍ້າຂອງສາກົນ(ຄມສ) ຄັ້ງທີ II ເຊິ່ງຈັດຂຶ້ນຢູ່ ນະຄອນຫຼວງວຽງຈັນ ໃນວັນທີ 18 ກັນຍາ 2024, ທ່ານ ປອ ນ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ສປປ ລາວ, ປະທານຄະນະກຳມະການແມ່ນ້ຳຂອງແຫ່ງຊາດ ແລະ ປະທານສະພາມົນຕີຄະນະກຳມາທິການແມ່ນ້ຳຂອງສາກົນ ປີ 2024 ໄດ້ພົບປະສອງຝ່າຍ ກັບ ທ່ານ ທ່ານ ດາໂຕ ຈວນດາ, ລັດຖະມົນຕີ ກະຊວງການພັດທະນາ ປະເທດ ບຣູໄນ ດາຣູຊາຣາມ ເພື່ອປຶກສາຫາລື ແລະ ສືບຕໍ່ຊຸກຍູ້ການພົວພັນຮ່ວມມື ໃນຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ກໍ່ຄືແນໃສ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ໃຫ້ມີບາດກ້າວຂະຫຍາຍຕົວຍິ່ງໆຂຶ້ນ.

• 

• 

• 

• 

• 

• 

• 

• 

• 

ໃນວັນທີ 18 ກັນຍາ 2024, ທີ່ນະຄອນຫຼວງວຽງຈັນ ກອງເລຂາຄະນະກຳມາທິການແມ່ນ້ຳຂອງສາກົນ ແລະ ກອງເລຂາອາຊຽນ ໄດ້ຈັດ ກອງປະຊຸມເວທີສົນທະນາ ຂັ້ນລັດຖະມົນຕີ ຂອງບັນດາປະເທດສະມາຊິກອາຊຽນ ແລະ ສະມາຊິກ ຄະນະກຳມາທິການແມ່ນໍ້າຂອງສາກົນ(ຄມສ) ຄັ້ງທີ II ພາຍໃຕ້ຫົວຂໍ້ "ຄວາມໝັ້ນຄົງດ້ານນ້ຳ" ໂດຍໃຫ້ກຽດກ່າວຕ້ອນຮັບ ຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີ ກະຊວງ ການຕ່າງປະເທດ ສປປ ລາວ, ພ້ອມທັງໃຫ້ກຽດກ່າວເປີດ ກອງປະຊຸມ ຂອງ ທ່ານ ປອ ນ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ສປປ ລາວ, ປະທານຄະນະກຳມະການແມ່ນ້ຳຂອງແຫ່ງຊາດ ແລະ ປະທານສະພາມົນຕີຄະນະກຳມາທິການແມ່ນ້ຳຂອງສາກົນ ປີ 2024, ໂດຍການເຂົ້າຮ່ວມຂອງທ່ານລັດຖະມົນຕີ, ຮອງລັດຖະມົນຕີ, ບັນດາເອກອັກຄະລັດຖະທູດ ປະຈຳ ສປປ ລາວ ແລະ ເຈົ້າໜ້າທີ່ລະດັບສູງຈາກບັນດາປະເທດສະມາຊິກອາຊຽນ ແລະ ຄະນະກຳມາທິການແມ່ນ້ຳຂອງສາກົນ ພ້ອມດ້ວຍນັກວິຊາການ, ກອງເລຂາຄະນະກຳມາທິການແມ່ນ້ຳຂອງສາກົນ ແລະ ອົງການຈັດຕັ້ງສາກົນ ເຂົ້າຮ່ວມ. ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອແລກປ່ຽນຂໍ້ມູນ-ຂ່າວສານ, ບົດຮຽນ ແລະ ປະສົບການອັນດີ, ໂດຍສຸມໃສ່ການກໍານົດທ່າອ່ຽງ, ສິ່ງທ້າທາຍ, ກາລະໂອກາດ ເພື່ອຜົນປະໂຫຍດຮ່ວມກັນ ພ້ອມທັງເນັ້ນໜັກເຖິງຫຼັກການລວມ ເພື່ອແກ້ໄຂບັນຫາການຮັບປະກັນດ້ານນໍ້າ ທີ່ມີຄວາມສໍາຄັນໃນທົ່ວອາຊີ ຕາເວັນອອກສຽງໃຕ້, ເຊິ່ງຫົວຂໍ້ດັ່ງກ່າວ ແມ່ນສອດຄ່ອງກັບຄໍາຂວັນໃນການເປັນປະທານອາຊຽນຂອງ ສປປ ລາວ ໃນປີ 2024 ຄື: “ເພີ່ມທະວີການເຊື່ອມຈອດ ແລະ ຄວມເຂັ້ມແຂງອາຊຽນ” (ASEAN: Enhancing Connectivity and Resilience).

ສຳລັບກອງປະຊຸມເວທີສົນທະນາ ກ່ຽວກັບຄວາມໝັ້ນຄົງດ້ານນໍ້າ ລະຫວ່າງ ຄະນະກຳມາທິການແມ່ນໍ້າຂອງສາກົນ - ອາຊຽນ ແມ່ນເວທີຮ່ວມມື ລະຫວ່າງ ສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ແລະ ຄະນະກຳມາທິການແມ່ນໍ້າຂອງສາກົນ (ຄມສ) ເພື່ອແນໃສ່ແກ້ໄຂສິ່ງທ້າທາຍ ແລະ ການຮັບປະກັນດ້ານນໍ້າໃນອ່າງແມ່ນໍ້າຂອງ ແລະ ພາກພື້ນອາຊຽນ. ກອງປະຊຸມໄດ້ມີການລິເລີ່ມໂດຍອີງໃສ່ຂອບການຮ່ວມມື ແລະ ໄດ້ລົງນາມຮ່ວມກັນໃນປີ 2018 ລະຫວ່າງອາຊຽນ ແລະ ຄມສ. ການເຈລະຈາຄວາມປອດໄພດ້ານນໍ້າອາຊຽນ-ຄມສ ຄັ້ງທຳອິດໄດ້ດຳເນີນໄປໃນເດືອນສິງຫາ 2021ຈັດໂດຍກອງເລຂາ ຄມສ ຮ່ວມກັບ ກອງເລຂາອາຊຽນ ເຊິ່ງມີຄະນະຜູ້ແທນລະດັບ: ເຈົ້າໜ້າທີ່ອາວຸໂສ, ຊ່ຽວຊານດ້ານວິຊາການ, ຄູ່ຮ່ວມງານຈາກພາກພື້ນແມ່ນໍ້າຂອງ ແລະ ຈາກບັນດາປະເທດສະມາຊິກອາຊຽນ ເຂົ້າຮ່ວມແລກປ່ຽນຄຳຄິດເຫັນ,ກໍານົດກາລະໂອກາດການຮ່ວມມື, ເສີມສ້າງຄວາມສາມາດຂອງພາກພື້ນ ແລະ ທ້ອງຖິ່ນໃນການແກ້ໄຂບັນຫາການຂາດແຄນນໍ້າ, ມົນລະພິດ, ຄວາມສ່ຽງໄພພິບັດທີ່ກ່ຽວຂ້ອງກັບນ້ຳ. ການແກ້ໄຂຫົວຂໍ້ທີ່ສໍາຄັນທີ່ຕິດພັນກັບນະໂຍບາຍ, ເຕັກໂນໂລຊີ ແລະການຮ່ວມມື ໄດ້ຍົກຂຶ້ນມາປຶກສາຫາລື ເພື່ອຊ່ວຍປະເທດຕ່າງໆໃນພາກພື້ນ ໄດ້ມີການກະກຽມຮັບມືກັບສິ່ງທ້າທາຍດ້ານຄວາມປອດໄພດ້ານນໍ້າ. ການສົນທະນາແລກປ່ຽນບົດຮຽນ ແລະ ປະສົບການດັ່ງກ່າວເປັນເວທີທີ່ສຳຄັນ ເພື່ອຊຸກຍູ້ການຮ່ວມມື ແລະ ການປະສານງານໃນການຮັບປະກັນຄວາມໝັ້ນຄົງດ້ານນໍ້າ ສໍາລັບການພັດທະນາແບບຍືນຍົງຂອງພາກພື້ນ.

• 

• 

• 

• 

• 

• 

• 

• 

• 

• 

• 

•