Author - admin

ໃນຕອນແລງຂອງວັນທີ 25 ສິງຫາ 2025 ທີ່ກົມອຸຕຸນິຍົມ ແລະ ອຸທົກກະສາດ ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ລົງຕິດຕາມຊຸກຍູ້ ການເຝົ້າລະວັງ ສະພາບໄພພິບັດທີ່ອາດຈະເກີດຂຶ້ນໃນໄລຍະວັນທີ 25-27 ສິງຫາ 2025 ເນື່ອງຈາກ ປັດຈຸບັນພາຍຸໄຕ້ຝຸ່ນຄາຈິກິ (TY KAJIKI) ຫົວທີ 13 ປະຈຳປີ 2025 ປັດຈຸບັນໄດ້ເພີ່ມກຳລັງແຮງຂຶ້ນ ແລະ ກໍາລັງເຄື່ອນທີ່ມາທາງເຂດທະເລຈີນໃຕ້ຕອນກາງ ໃກ້ກັບພາກກາງ ຂອງ ສສ ຫວຽດນາມ, ເຊິ່ງມີຈຸດສູນກາງໃນເສັ້ນຂະໜານທີ 14.4 ອົງສາເໜືອ ແລະ ເສັ້ນແວງທີ 107.4 ອົງສາຕາເວັນອອກ ດ້ວຍຄວາມໄວ 20 ກິໂລແມັດຕໍ່ຊົ່ວໂມງ, ຄາດວ່າພາຍຸຫົວນີ້ຈະເຄື່ອນທີ່ຂຶ້ນຝັ່ງທາງພາກກາງ ຂອງ ສສ ຫວຽດນາມ ໃນຕອນຄ່ຳຂອງມື້ນີ້.ຈາກນັ້ນຈະສືບຕໍ່ເຄື່ອນທີ່ຜ່ານ ພາກກາງ ແລະ ພາກເໜືອຂອງ ສປປ ລາວ ໃນໄລຍະວັນທີ 25 ຫາ 26 ສິງຫາ 2025 ນີ້. ຊຶ່ງຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມ ໃນລະດັບຄ່ອຍ ຫາ ປານກາງ ຢູ່ທົ່ວໄປໃນແຕ່ລະພາກ ແລະ ມີຝົນຕົກໜັກ ຫາ ຕົກໜັກຫຼາຍ ພ້ອມຈະມີລົມພັດແຮງຢູບາງທ້ອງຖິ່ນ ໃນໄລຍະວັນທີ 25 ຫາ 27 ສິງຫາ 2025 ເຊິ່ງທ່ານໄດ້ມີການແຕ່ງຕັ້ງທີມງານປະຈຳການຕະຫຼອດ 24 ຊົ່ວໂມງ ເພື່ອເຝົ້າລະວັງສະພາບລະດັບນ້ຳ, ສະພາບອາກາດ ຖ້າຫາກຢູ່ໃນລະດັບເຕືອນໄພ ຈຶ່ງຈະສາມາດແຈ້ງເຕືອນໃຫ້ພໍ່ແມ່ປະຊາຊົນ ກຽມຮັບມືຢ່າງທັນການ ເພື່ອຫຼຸດຜ່ອນຜົນເສຍຫາຍທີ່ອາດຈະເກີດຂຶ້ນ.

ໃນວັນທີ 7 ສິງຫາ 2025, ກອງເລຂາຄະນະກຳມະການແມ່ນ້ຳຂອງແຫ່ງຊາດ ກະຊວງ ກະສິກຳ ແລະ ສິ່ງແວດລ້ອມ ໄດ້ຮ່ວມກັບ ຄະນະກໍາມາທິການແມ່ນໍ້າຂອງສາກົນ ໄດ້ຈັດພິທີຝຶກອົບຮົມການນໍາໃຊ້ຄຳສັ່ງ ໃນແອບພິເຄຊັນ ONE MEKONG ເພື່ອສະໜັບສະໜູນການແຈ້ງເຕືອນລ່ວງໜ້າໂດຍຊຸມຊົນ ໂດຍໃຫ້ກຽດເຂົ້າຮ່ວມພິທີຂອງ ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ, ມີ ທ່ານ ຫົວໜ້າກອງເລຂາຄະນະກຳມະການແມ່ນ້ຳຂອງແຫ່ງຊາດ, ຄະນະກົມອຸຕຸນິຍົມ ແລະ ອຸທົກກະສາດ, ມີ ທ່ານຫົວໜ້າກອງເລຂາ ຄະນະກໍາມາທິການແມ່ນໍ້າຂອງສາກົນ ພ້ອມດ້ວຍ ຫົວໜ້າພະແນກ, ຮອງພະແນກຂັ້ນສູນກາງ ແລະ ຂັ້ນທ້ອງຖິ່ນ ທີ່ກ່ຽວຂ້ອງ ເຂົ້າຮ່ວມ.ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ໄດ້ກ່າວເປີດພິທີໃນບາງຕອນວ່າ ກະຊວງກະສິກຳ ແລະ ສິ່ງແວດລ້ອມ ໃນຖານະ ເປັນເສນາທິການໃນການຕິດຕາມສະພາບອຸຕຸນິຍົມ ແລະ ອຸທົກກະສາດ ແລະ ການແຈ້ງເຕືອນໄພລ່ວງໜ້າ ກໍ່ໄດ້ເອົາໃຈໃສ່ ແລະ ເຮັດວຽກຢ່າງຕັ້ງໜ້າເພື່ອຫຼຸດຜ່ອນຄວາມສ່ຽງທີ່ອາດເກີດຂຶ້ນຈາກໄພທໍາມະຊາດ ໂດຍສະເພາະ ການເພີ່ມທະວີໃນການພະຍາກອນອາກາດ ແລະ ຕິດຕາມສະພາບອາກາດ ແລະ ນໍ້າ ໂດຍສົມທົບກັບຫຼາຍຂະແໜງການ ໃນນັ້ນ ກໍ່ແມ່ນ ຄະນະກໍາມາທິການແມ່ນໍ້າຂອງສາກົນ. ເຊິ່ງທາງຄະນະກໍາມາທິການແມ່ນໍ້າຂອງສາກົນ ໄດ້ພັດທະນາ ແລະ ນໍາສະເໜີ ແອັບ One Mekong App ເຊີ່ງເປັນເຄື່ອງມືອອກແບບເພື່ອລາຍງານຂໍ້ມູນອຸຕຸ ແລະ ອຸທົກກະສາດ. ເຄື່ອງມືດັ່ງກ່າວສາມາດເຂົ້າເບິ່ງລະດັບນໍ້າ, ການພະຍາກອນອາກາດ, ການຕິດຕາມໄພນໍ້າຖ້ວມ ແລະ ໄພແຫ້ງແລ້ງ ແລະ ການແຈ້ງເຕືອນໄພພິບັດຕ່າງໆ ໂດຍອີງໃສ່ຂໍ້ມູນຈາກເຄືອຂ່າຍສະຖານີຫຼັກຂອງຄະນະກໍາມາທິການແມ່ນໍ້າຂອງສາກົນ. ໃນພິທີ ຍັງໄດ້ຮັບຟັງການນຳສະເໜີກ່ຽວກັບຄຳສັ່ງ iReport ໃນແອັບດັ່ງກ່າວ ເພື່ອລາຍງານສະພາບນໍ້າຖ້ວມ, ແຫ້ງແລ້ງ ຜ່ານການຖ່າຍພາບ, ການລະບຸທີ່ຕັ້ງ ແລະ ອະທິບາຍສະພາບເຫດການເຊີ່ງຈະສ້າງໃຫ້ຜູ້ມີສ່ວນຮ່ວມໃນທ້ອງຖິ່ນຈາກທີ່ເປັນຜູ້ຮັບຂໍ້ມູນ ກາຍເປັນຜູ້ປະກອບສ່ວນຢ່າງຕັ້ງໜ້າ. ໂດຍເປີດໂອກາດໃຫ້ຊາວບ້ານ ຫຼື ຜູ້ຕິດຕາມສະພາບນໍ້າໃນລະດັບທ້ອງຖິ່ນໄດ້ສົ່ງຂໍ້ມູນໃນພື້ນທີ່ຕົວຈິງ ແລະ ລາຍງານສະພາບການໄດ້ຢ່າງທັນການ, iReport ຈະເຮັດໃຫ້ລະບົບແຈ້ງເຕືອນໄພລ່ວງໜ້າສາມາດກະຈ່າຍຂ່າວໄດ້ໄວຂຶ້ນ ແລະ ເຮັດໃຫ້ການຕອບໂຕ້ສຸກເສີນຖືກຈັດຕັ້ງປະຕິບັດໄດ້ໂດຍໄວ. ຊ່ອງທາງການສື່ສານສອງຝ່າຍນີ້ຈະສ້າງຄວາມເຊື່ອໝັ້ນ ແລະ ການມີສ່ວນຮ່ວມລະຫວ່າງທ້ອງຖິ່ນ ແລະ ການຈັດຕັ້ງ ເຮັດໃຫ້ຄວາມສາມາດໃນລະດັບພາກພື້ນສາມາດຮັບມືກັບໄພທໍາມະຊາດໄດ້ຢ່າງມີປະສິດທິຜົນຂຶ້ນກວ່າເກົ່າ. ໃນຕອນທ້າຍພິທີຍັງໄດ້ມີພິທີມອບຮັບອຸປະກອນ ໂທລະສັບໃຫ້ ກົມອຸຕຸນິຍົມ ແລະ ອຸທົກກະສາດເພື່ອນຳໃຊ້ໃນແອັບ One Mekong App ແລະ ມອບອຸປະກອນກູ້ໄພທາງນ້ຳເຂົ້າໃນວຽກງານຕອບໂຕ້ ໄພພິບັດຂັ້ນແຂວງ ແຂວງຈຳປາສັກ ໂດຍ ການເປັນສັກຂີພິຍານຂອງຜູ້ເຂົ້າຮ່ວມໃນງານດັ່ງກ່າວອີກດ້ວຍ.

*ແຫຼ່ງຂ່າວ: ຂ່າວສານກະສິກໍາ ແລະ ສິ່ງແວດລ້ອມ

ໃນວັນທີ 06 ສິງຫາ 2025, ທີ່ຫ້ອງປະຊຸມ ພະແນກກະສິກຳ ແລະ ສິ່ງແວດລ້ອມ ແຂວງ ຈຳປາສັກ, ກອງເລຂາຄະນະກຳມະການແມ່ນ້ຳຂອງແຫ່ງຊາດ ໄດ້ຈັດກອງປະຊຸມລິເລີ່ມຈັດຕັ້ງປະຕິບັດ “ໂຄງການ ການປະຕິບັດງານການພະຍາກອນໄພນໍ້າຖ້ວມຕາມເວລາຕົວຈິງ ຂອງ ສປປ ລາວ ແລະ ເຂດແມ່ນໍ້າຂອງຕອນກາງ” ໂດຍການເປັນປະທານ ຂອງ ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ, ມີ ທ່ານຫົວໜ້າກອງເລຂາຄະນະກຳມະການແມ່ນ້ຳຂອງແຫ່ງຊາດ, ທ່ານ ຮອງຫົວໜ້າກົມອຸຕຸນິຍົມ ແລະ ອຸທົກກະສາດ, ມີຜູ້ຕາງໜ້າຈາກ ພະແນກກະສິກໍາ ແລະ ສິ່ງແວດລ້ອມ ແຂວງບໍ່ແກ້ວ, ຫຼວງນໍ້າທາ, ໄຊຍະບູລີ, ຫຼວງພະບາງ, ຄໍາມ່ວນ, ສະຫວັນນະເຂດ, ສາລະວັນ, ແລະ ແຂວງຈໍາປາສັກ ເຂົ້າຮ່ວມ.

ໃນທີ່ປະຊຸມ ຕາງໜ້າກອງເລຂາຄະນະກຳມະການແມ່ນ້ຳຂອງແຫ່ງຊາດ ໄດ້ນຳສະເໜີ ພາບລວມກ່ຽວກັບໂຄງການດັ່ງກ່າວວ່າ ໂຄງການ ການປະຕິບັດງານການພະຍາກອນໄພນໍ້າຖ້ວມຕາມເວລາຕົວຈິງ ຂອງ ສປປ ລາວ ແລະ ເຂດແມ່ນໍ້າຂອງຕອນກາງ ແມ່ນເປັນໂຄງການຮ່ວມກັນຈັດຕັ້ງປະຕິບັດ ລະຫວ່າງ ສປປ ລາວ ແລະ ສປ ຈີນ ຊຶ່ງແມ່ນ ກອງເລຂາຄະນະກຳມະການແມ່ນໍ້າຂອງແຫ່ງຊາດ, ກົມອຸຕຸນິຍົມ ແລະ ອຸທົກກະສາດ ກະຊວງ ກະສິກຳ ແລະ ສິ່ງແວດລ້ອມ ສປປ ລາວ ຮ່ວມກັບສະຖາບັນຄົ້ນຄວ້າໄຟຟ້າພະລັງນໍ້າ ແລະ ຊັບພະຍາກອນນໍ້າ ສປ.ຈີນ, ກະຊວງຊັບພະຍາກອນນ້ຳ ສປ. ຈີນ (China Institute of Water Resources and Hydropower Research) ມີຈຸດປະສົງ ໃນການສ້າງຄວາມເຂັ້ມແຂງ ແລະ ການສັງລວມຂໍ້ມູນອຸທົກກະສາດ ໃຫ້ເປັນລະບົບຄົບຊຸດ ແລະ ທັນສະໄໝຂຶ້ນເທື່ອລະກ້າວ, ທັງຮັບປະກັນການ ສະໜອງຂໍ້ມູນ-ຂ່າວສານ ໃຫ້ແກ່ການວາງແຜນຄຸ້ມຄອງ, ເຕືອນໄພລ່ວງໜ້າ ແລະ ການພະຍາກອນຕ່າງໆ ໂດຍສາມາດຮັບມືກັບສະພາບໄພພິບັດທຳມະຊາດທີ່ອາດຈະເກີດຂຶ້ນໄດ້ຢ່າງທັນການ ແລະ ຍືນຍົງ, ສາມາດຫຼຸດຜ່ອນຜົນກະທົບດ້ານຕ່າງໆ ທີ່ມີຕໍ່ການດຳລົງຊີວິດຂອງປະຊາຊົນບັນດາເຜົ່າ ແລະ ກິດຈະການພັດທະນາຕ່າງໆ.

ໄລຍະເວລາຂອງການຈັດຕັ້ງປະຕິບັດໂຄງການແມ່ນແຕ່ປີ 2024-2026. ຫຼັງຈາກນັ້ນ ໃນທີ່ປະຊຸມກໍໄດ້ມີການປຶກສາຫາລືກັນຢ່າງກົງໄປກົງມາກ່ຽວກັບການຈັດຕັ້ງປະຕິບັດໂຄງການດັ່ງກ່າວເພື່ອໃຫ້ເປັນໄປຢ່າງມີປະສິດທິພາບ ແລະ ບັນລຸຕາມຈຸດປະສົງທີ່ວາງໄວ້.ໃນຕອນບ່າຍຂອງວັນດຽວກັນ ຜູ້ເຂົ້າຮ່ວມກອງປະຊຸມຍັງໄດ້ ລົງພາກສະໜາມເພື່ອຢ້ຽມຢາມສະຖານີອຸຕຸນິຍົມ ແລະ ອຸທົກກະສາດ/ການວັດແທກການພະຍາກອນໄພນໍ້າຖ້ວມ ທີ່ແຂວງຈໍາປາສັກ ອີກດ້ວຍ.

ໃນວັນ 31 ກໍລະກົດ 2025 ຢູ່ທີ່ກົມຊັບພະຍາກອນນ້ຳ, ກະຊວງກະສິກຳ ແລະ ສິ່ງແວດລ້ອມ ໄດ້ຈັດກອງປະຊຸມ ປືກສາຫາລື ກ່ຽວກັບ ຄວາມພ້ອມການຮັບມືກັບໄພນໍ້າຖ້ວມ ແລະ ການລະບາຍນໍ້າໃນ ນະຄອນຫລວງວຽງຈັນ ໂດຍພາຍໃຕ້ ການເປັນປະທານ ຂອງ ທ່ານ ຈັນທະເນດ ບົວລະພາ, ຮອງລັດຖະມົນຕີ ກະຊວງ ກະສິກຳ ແລະ ສິ່ງແວດລ້ອມ ແລະ ມີບັນດາຫົວໜ້າກົມ, ຮອງກົມ ພາຍໃນ ກະຊວງກະສິກຳ ແລະ ສິ່ງແວດລ້ອມ, ຮອງຫົວຫນ້າ ພະແນກການ ອ້ອມຂ້າງ ໃນນະຄອນຫຼວງ, ຕາງໜ້າຈາກ ຫ້ອງການຄຸ້ມຄອງບໍລິຫານຕົວເມືອງ ນະຄອນຫຼວງວຽງຈັນ ພ້ອມດ້ວຍ ວິຊາການທີ່ກ່ຽວຂ້ອງເຂົ້າຮ່ວມ.

ໃນທີ່ປະຊຸມໄດ້ຮັບຟັງການນຳສະເໜີ ຈຸດປະຕູນ້ຳທີ່ເປັນບູລິມະສິດຕ້ອງການປັບປຸງ ຈາກ ພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ; ຮັບຟັງການຈັດຕັ້ງປະຕິບັດໂຄງການຕ້ານແລ້ງ-ຕ້ານຖ້ວມ ໃນນະຄອນຫຼວງ ຈາກຕາງໜ້າກົມຊົນລະປະທານ. ຫຼັງຈາກນັ້ນໃນທີ່ປະຊຸມກໍໄດ້ມີການປຶກສາຫາລືກັນເພື່ອຈັດຕັ້ງປະຕິບັດວຽກງານດັ່ງກ່າວ.

ໃນວັນຕໍ່ມາ ທ່ານຮອງລັດຖະມົນຕີ ພ້ອມດ້ວຍຄະນະກໍ່ໄດ້ລົງຕິດຕາມເບິ່ງພື້ນທີ່ຕົວຈິງຢູ່ທີ່ ຈຸດສູບນ້ຳ ຫ້ວຍນ້ຳມູນ, ໄປທີ່ບ້ານໂດນ ປະຕູນໍ້າຫ້ວຍໂດນ, ຫ້ວຍກຸງ ບ້ານນາກຸງ ເມືອງປາກງື່ມ, ຈຸດຮ່ອງພະຂາວ ບ້ານພະຂາວ ເມືອງໄຊທານີ ອີກດ້ວຍ.

*ແຫຼ່ງຂ່າວ: ຂ່າວສານ ກະສິກໍາ ແລະ ສິ່ງແວດລ້ອມ

ໃນຕອນແລງຂອງວັນທີ 20 ກໍລະກົດ 2025 ທີ່ກົມອຸຕຸນິຍົມ ແລະ ອຸທົກກະສາດ ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ພ້ອມດ້ວຍຄະນະກົມອຸຕຸນິຍົມ ແລະ ອຸທົກກະສາດ, ກົມຊັບພະຍາກອນນ້ຳ, ກົມຊົນລະປະທານ, ກອງເລຂາແມ່ນ້ຳຂອງແຫ່ງຊາດ ໄດ້ລົງຕິດຕາມຊຸກຍູ້ ການເຝົ້າລະວັງ ສະພາບໄພພິບັດທີ່ອາດຈະເກີດຂຶ້ນໃນໄລຍະວັນທີ 21-23 ກໍລະກົດ 2025 ເນື່ອງຈາກ ປັດຈຸບັນພາຍຸໝູນເຂດຮ້ອນ ວິພາ (Wipha)ມີຈຸດສູນກາງໃນເສັ້ນຂະໜານທີ 21.5ອົງສາເໜືອ ແລະ ເສັ້ນແວງທີ່ 110,4 ອົງສາຕາເວັນອອກ, ພາຍຸຫົວນີ້ກຳລັງເຄື່ອນທີ່ໄປທາງທິດຕາເວັນຕົກ-ຕາເວັນຕົກສ່ຽງໃຕ້ ດ້ວຍຄວາມໄວ 90 ກິໂລແມັດຕໍ່ຊົ່ວໂມງ ຄາດວ່າຈະອ່ອນກໍາລັງລົງກາຍເປັນພາຍຸ ດີເປຼຣຊັນ ແລະ ຈະເຄື່ອນທີ່ຂື້ນແຄມຝັ່ງພາກເໜືອຂອງສສ ຫວຽດນາມ ໃນຄ່ຳຄືນຂອງວັນທີ 22 ກໍລະກົດ 2025. ຈາກນັ້ນຈະອ່ອນກໍາລັງລົງກາຍເປັນຄວາມກົດດັນອາກາດຕໍ່າທີ່ມີກໍາລັງແຮງປົກຄຸມຢູ່ທາງພາກ ເໜືອຂອງ ສປປ ລາວ. ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ຫາ ປານກາງຢູ່ທົ່ວໄປໃນແຕ່ລະພາກ ແລະ ຕົກໜັກ ຫາ ໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນ. ເຊິ່ງໄດ້ມີການແຕ່ງຕັ້ງທີມງານປະຈຳການຕະຫຼອດ 24 ຊົ່ວໂມງ ເພື່ອເຝົ້າລະວັງສະພາບລະດັບນ້ຳ, ສະພາບອາກາດ ຖ້າຫາກຢູ່ໃນລະດັບເຕືອນໄພ ຈຶ່ງຈະສາມາດແຈ້ງເຕືອນໃຫ້ພໍ່ແມ່ປະຊາຊົນ ກຽມຮັບມືຢ່າງທັນການ ເພື່ອຫຼຸດຜ່ອນຜົນເສຍຫາຍທີ່ອາດຈະເກີດຂຶ້ນ.

*ແຫຼ່ງຂ່າວ: ຂ່າວສານກະສິກໍາ ແລະ ສິ່ງແວດລ້ອມ

ໃນຊ່ວງໄລຍະປະຈຸບັນມີຝົນຕົກໜັກທົ່ວທຸກພາກຂອງ ສປປ ລາວ. ກະຊວງກະສິກຳ ແລະ ສິ່ງແວດລ້ອມ, ທ່ານ ນາງ ປອ ຈັນທະຄອນ ບົວລະພັນ ແລະ ທ່ານ ຈັນທະເນດ ບົວລະພາ ຮອງລັດຖະມົນຕີກະຊວງກະສິກຳ ແລະ ສິ່ງແວດລ້ອມ ພ້ອມດ້ວຍ ທ່ານ ອານຸສອນ ຄຸນສົມບັດ ຮັກສາການຫົວໜ້າກົມຊົນລະປະທານ, ກົມຊັບພະຍາກອນນໍ້າ, ພະແນກກະສິກຳ ແລະ ປ່າໄມ້ ນະຄອນຫລວງ, ຫ້ອງການກະສິກຳ ແລະ ປ່າໄມ້ ເມືອງ ລົງຕິດຕາມກວດກາລະບົບອາຄານປະຕູປ້ອງກັນນໍ້າຖ້ວມ ແລະ ຈຸດຫລໍ່ແຫຼມ ໃນຂອບເຂດນະຄອນຫລວງວຽງຈັນ. (ປະຕູນໍ້າຫ້ວຍມູນ ເມືອງ ສີໂຄດຕະບອງ, ປະຕູນໍ້າຫ້ວຍເດື່ອ ເມືອງ ຫາດຊາຍຟອງ ແລະ ປະຕູນໍ້າຫ້ວຍໝາກຮຽວ ເມືອງ ປາກງື່ມ)
*ແຫຼ່ງຂ່າວ: ຂ່າວສານກະສິກໍາ ແລະ ສິ່ງແວດລ້ອມ

ໃນຕອນບ່າຍຂອງວັນທີ 1 ກໍລະກົດ 2025 ທີ່ຫ້ອງປະຊຸມ ກົມຊັບພະຍາກອນນ້ຳ ກະຊວງ ກະສິກຳ ແລະ ສິ່ງແວດລ້ອມ ໄດ້ມີ ກອງປະຊຸມປຶກສາຫາລື ກ່ຽວກັບ ການຄາດຄະເນ ແລະ ກະກຽມຮັບມືກັບໄພນໍ້າຖ້ວມ ປະຈຳປີ 2025 ໂດຍການເປັນປະທານຂອງ ທ່ານ ຈັນທະເນດ ບົວລະພາ ຮອງລັດຖະມົນຕີກະຊວງກະສິກຳ ແລະ ສິ່ງແວດລ້ອມ ໂດຍມີ ຫົວໜ້າກົມ ຮອງກົມ ຊັບພະຍາກອນນ້ຳ, ກົມອຸຕຸນິຍົມ ແລະ ອຸທົກກະສາດ, ກົມຊົນລະປະທານ, ກົມລ້ຽງສັດ ແລະ ການປະມົງ, ກົມປູກຝັງ, ກອງເລຂາຄະນະກຳມະການແມ່ນ້ຳຂອງ ແຫ່ງຊາດ ພ້ອມດ້ວຍພະນັກງານຫຼັກແຫຼ່ງທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ແມ່ນເພື່ອນຳສະເໜີຂໍ້ມູນການພະຍາກອນ, ການສ້າງຕົວແບບຈຳລອງນໍ້າຖ້ວມ ແລະ ການກະກຽມມາດຕະການ ແລະ ການປະສານງານຂອງທຸກຂະແໜງການເພື່ອພ້ອມກັນກະກຽມຮັບມືກັບໄພນໍ້າຖ້ວມ ທີ່ອາດຈະເກີດຂຶ້ນ ໃນຊ່ວງທີ່ຄາດການວ່າພາຍຸອາດຈະພັດຜ່ານ ສປປ ລາວ ໃນເດືອນກໍລະກົດ ແລະ ເດືອນສິງຫາ 2025 ນີ້. ນອກນັ້ນ ໃນທີ່ປະຊຸມຍັງໄດ້ຮັບຟັງລາຍງານຈາກ ຊ່ຽວຊານ ຂອງ ກອງເລຂາຄະນະກຳມາທິການແມ່ນໍ້າຂອງສາກົນ (MRCS) ມານຳສະເຫນີ ກ່ຽວກັບ ການຄາດຄະເນ ແລະ ການກຽມພ້ອມຮັບມືກັບໄພນໍ້າຖ້ວມ ໃນອ່າງແມ່ນໍ້າຂອງ ໂດຍສະເພາະຕາມລໍາແມ່ນໍ້າຂອງ ໃນ ສປປ ລາວ ເພື່ອເປັນການແລກປ່ຽນຂໍ້ມູນເຊິ່ງກັນ ແລະ ກັນລ່ວງໜ້າ ຫຼັງຈາກນັ້ນ ກໍໄດ້ມີການປຶກສາຫາລື ປະກອບຄຳຄິດຄຳເຫັນເພື່ອກຽມຮັບມືກັບ ໄພທຳມະຊາດ ທີ່ອາດຈະເກີດຂື້ນ.

ໃນຕອນທ້າຍ ຂອງກອງປະຊຸມ, ທ່ານ ຈັນທະເນດ ບົວລະພາ, ຮອງລັດຖະມົນຕີ ກໍ່ໄດ້ເນັ້ນຍໍ້າໃຫ້ບັນດາຂະແໜງການຕ່າງໆ ເອົາໃຈໃສ່ຕໍ່ກັບວຽກງານເຝົ້າລະວັງ, ຕິດຕາມ ແລະ ແຈ້ງເຕືອນໄພນໍ້າຖ້ວມ ຂອງ ກົມອຸຕຸນິຍົມ ແລະ ອຸທົກກະສາດ ໂດຍເຮັດວຽກຮ່ວມກັນຢ່າງໃກ້ຊິດ ເພື່ອຫຼຸດຜ່ອນຜົນກະທົບທາງລົບຕໍ່ກັບ ຊີວິດການເປັນຢູ່ ແລະ ຊັບສິນຂອງປະຊາຊົນ.

ໃນວັນທີ 30 ມິຖຸນາ 2025, ທີ່ ຫ້ອງປະຊຸມ ກອງເລຂາຄະນະກຳມາທິການແມ່ນ້ຳຂອງສາກົນ ໄດ້ຈັດຝຶກອົບຮົມກ່ຽວກັບການກູ້ໄພທາງນ້ຳ ເພື່ອກະກຽມຮັບມືກັບໄພນ້ຳຖ້ວມ ແລະ ມອບ-ຮັບເຄື່ອງອຸປະກອນກູ້ໄພ ພາຍໃຕ້ກອບການຮ່ວມມືສາມຝ່າຍ (ລາວ - ສປ ຈີນ - GIZ) ໂດຍການເຂົ້າຮ່ວມຂອງ ທ່ານ ພອນປະເສີດ ພູລິພັນ, ຫົວໜ້າ ກອງເລຂາຄະນະກໍາມະການແມ່ນໍ້າຂອງແຫ່ງຊາດ, ກະຊວງກະສິກໍາ ແລະ ສິ່ງແວດລ້ອມ, ທ່ານ ນາງ ບຸດສະດີ ສັນຕິພິທັກ ຫົວໜ້າກອງເລຂາຄະນະກຳມະທິການເເມ່ນ້ຳຂອງສາກົນ, ທ່ານ Marcus Lange ຫົວໜ້າພະແນກຮ່ວມມືອາຊີ GIZ, ທ່ານ ນາງ Sun Yanna ຮອງຫົວໜ້າພະແນກຮ່ວມມືສາກົນ ສູນຫຼຸດຜ່ອນຄວາມສ່ຽງໄພພິບັດແຫ່ງຊາດຂອງ ສປ ຈີນ, ນອກນັ້ນ ມີຜູ້ຕາງໜ້າ ຈາກ ກົມກອງອ້ອມຂ້າງພາຍໃນກະຊວງກະສິກຳ ແລະ ສິ່ງແວດລ້ອມ, ກົມສັງຄົມສົງເຄາະ, ກະຊວງແຮງງານ ແລະ ສະຫວັດດິການສັງຄົມ, ກົມສື່ມວນຊົນ, ແລະ ພະນັກງານຂະແໜງການທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມທັງໝົດ 40 ກວ່າທ່ານ.

ສຳລັບ ກອບການຮ່ວມມືສາມຝ່າຍ (ລາວ - ສປ ຈີນ - GIZ) ແມ່ນເພື່ອສະໜັບສະໜູນການຄຸ້ມຄອງໄພນໍ້າຖ້ວມ ແລະ ໄພພິບັດທາງທຳມະຊາດ ໃຫ້ແກ່ ສປປ ລາວ ໂດຍຜ່ານ ກອງເລຂາຄະນະກຳມາທິການແມ່ນ້ຳຂອງສາກົນ, ສູນຫຼຸດຜ່ອນຄວາມສ່ຽງໄພພິບັດແຫ່ງຊາດຂອງ ສປ ຈີນ ທີ່ຮ່ວມກັນຈັດການຝຶກອົບຮົມດັ່ງກ່າວຂຶ້ນ ໂດຍຈຸດປະສົງກໍເພື່ອ (1) ສ້າງຄວາມສາມາດໃນການກູ້ໄພທາງນ້ຳໃຫ້ແກ່ພະນັກງານໃນບັນດາຂະແໜງການທີ່ກ່ຽວຂ້ອງ; (2) ເພື່ອຮັບຟັງປະສົບການ ແລະ ຝຶກຊ້ອມຕົວຈິງໃນການກະກຽມຮັບມືກັບໄພນ້ຳຖ້ວມ ແລະ (3) ປຶກສາຫາລື ແລະ ແລກປ່ຽນບົດຮຽນກ່ຽວກັບການປັບຕົວເຂົ້າກັບການປ່ຽນແປງດິນຟ້າອາກາດ ເຊິ່ງນອກຈາກຮຽນພາກທິດສະດີແລ້ວ ຜູ້ເຂົ້າຮ່ວມຝຶກອົບຮົມຍັງໄດ້ລົງຝຶກຊ້ອມໃນພື້ນທີ່ຕົວຈິງ ຢູ່ທີ່ແຄມຂອງ ຈຸດສະຖານີອຸທົກກະສາດ ທາງດ້ານຫລັງກົມອຸຕຸນິຍົມ ແລະ ອຸທົກກະສາດ ບ້ານອາກາດ ເມືອງສີໂຄດຕະບອງ ນະຄອນຫລວງວຽງຈັນ ຕື່ມອີກ ແລະ ນອກຈາກການຈັດເຝິກອົບຮົມແລ້ວ ທາງ ສປ ຈີນ - GIZ ຍັງໄດ້ມອບເຮືອກູ້ໄພຈໍານວນ 2 ລໍາ ແລະ ອຸປະກອນ ຊຸດຊູຊີບ 50 ຊຸດ ໃຫ້ແກ່ ສປປ ລາວ ໂດຍຜ່ານ ກອງເລຂາຄະນະກຳມາທິການແມ່ນ້ຳຂອງສາກົນ ແລະ ຕາງໜ້າຝ່າຍລາວຮັບໂດຍທ່ານ ພອນປະເສີດ ພູລິພັນ, ຫົວໜ້າ ກອງເລຂາ ຄະນະກໍາມະການແມ່ນໍ້າຂອງແຫ່ງຊາດ, ກະຊວງກະສິກໍາ ແລະ ສິ່ງແວດລ້ອມ ອີກດ້ວຍ.

*ແຫຼ່ງຂ່າວຈາກ: ຂ່າວສານກະສິກໍາ ແລະ ສິ່ງແວດລ້ອມ

ກອງເລຂາຄະນະກໍາມາທິການແມ່ນໍ້າຂອງສາກົນ ຮ່ວມກັບ ກອງເລຂາຄະນະກໍາມະການແມ່ນໍ້າຂອງແຫ່ງຊາດລາວ, ສໍານັກງານຊັບພະຍາກອນນໍ້າແຫ່ງປະເທດໄທ ພ້ອມດ້ວຍພາກສ່ວນທີ່ກ່ຽວຂ້ອງຂອງ 2 ປະເທດລາວ-ໄທ ໄດ້ຮ່ວມກັນຈັດກອງປະຊຸມຄັ້ງທີ່ 1 ຂອງຄະນະສະເພາະກິດຮ່ວມລາວ-ໄທ ເພື່ອພະຍາກອນໄພນ້ຳຖ້ວມລ່ວງໜ້າ ແລະ ການດຳເນີນງານຂອງເຂື່ອນ (Ad-Hoc Joint Flood and Hydropower Coordination) ໃນວັນທີ 23 ມິຖຸນາ 2025 ທີ່ຈັງຫວັດຊຽງລາຍ ປະເທດໄທ. ຈຸດປະສົງຫຼັກຂອງກອງປະຊຸມໃນຄັ້ງນີ້ ແມ່ນເພື່ອ: (1) ທົບທວນການຄາດຄະເນການພະຍາກອນນໍ້າຖ້ວມປະຈຳປີ 2025 ແລະ ກໍານົດຄວາມຕ້ອງການໃນການປະສານງານ; (2) ປຶກສາຫາລືແນວທາງໃນການປະສານງານຂອງເຂື່ອນໃນການຫຼຸດຜ່ອນໄພນໍ້າຖ້ວມ ແລະ ຈຳລອງສະຖານະການສຸກເສີນ; (3) ຄົ້ນຄວ້າ ແລະ ຊອກຫາແນວທາງການສ້າງຖານຂໍ້ມູນການດໍາເນີນງານຂອງເຂື່ອນຮ່ວມກັນ; (4) ແລກປ່ຽນປະສົບການການເຊື່ອມສານເສັ້ນບໍລິຫານຈັດການນໍ້າລວມສູນຂອງແຕ່ລະເຂື່ອນໃນຮູບແບບຂັ້ນໄດ; (5) ຮ່ວມກັນພັດທະນາກົນໄກການປະສານງານລະດັບພາກພື້ນ; ແລະ (6) ວາງແຜນໃນຕໍ່ໜ້າ ໂດຍສະເພາະມາດຕະການທີ່ຈັດຕັ້ງປະຕິບັດໄດ້ແທ້ ແລະ ກິດຈະກໍາຮ່ວມມືໃນອະນາຄົດ.

ເພື່ອໃຫ້ເກີດການບໍລິຫານຈັດການນໍ້າໃນແມ່ນໍ້າຂອງໃນໄລຍະລະດູຝົນຂອງປີນີ້, ກອງເລຂາຄະນະກໍາມາທິການແມ່ນໍ້າຂອງສາກົນ (MRCS) ຄາດການໄວ້ວ່າ ໃນຊ້ວງເດືອນກໍລະກົດຈະມີປະລິມານນໍ້າໃນແມ່ນໍ້າຂອງເພີ່ມຂຶ້ນ, ເຊິ່ງສົ່ງຜົນໃຫ້ມີຄວາມສ່ຽງຕໍ່ການເກີດນໍ້າລົ້ນຝັ່ງ ແລະ ອາດຈະກະທົບຕໍ່ປະຊາຊົນຢູ່ສອງຝັ່ງຂອງ. ຄະນະເຮັດວຽກຮ່ວມ ໄດ້ຮ່ວມກັນກໍານົດແນວທາງດໍາເນີນງານ ລວມເຖິງແນວທາງການເຊື່ອມສານບໍລິຫານຈັດການນໍ້າກັບໂຄງສ້າງໄຟຟ້າພະລັງນໍ້າ ຂອງ ສປປ ລາວ ເພື່ອເພີ່ມປະສິດຕິພາບການຄວບຄຸມລະດັບນໍ້າໃນແມ່ນໍ້າຂອງ, ການຄາດການພື້ນທີ່ສ່ຽງອຸທົກກະໄພ ໂດຍເພີ່ມເຕີມເອົາຂໍ້ມູນດ້ານສະພາບອາກາດ, ຊັບພະຍາກອນນໍ້າ ແລະ ພະລັງງານໃສ່ ໂດຍຄໍານຶງເຖິງຄວາມຖືກຕ້ອງ ແລະ ແມ້ນຢໍາທີ່ສຸດ, ລວມໄປເຖິງການປຶກສາຫາລືແຜນການສໍາຫຼວດຮູບຕັດລໍານໍ້າ ຂອງແມ່ນໍ້າຂອງ ແລະ ການສໍາຫຼວດພື້ນທີ່ຕໍ່່າ ເພື່ອໃຫ້ໄດ້ຂໍ້ມູນທີ່ເປັນປະຈຸບັນສໍາລັບໃຊ້ໃນການວາງແຜນ ແລະ ກໍານົດມາດຕະການປ້ອງກັນນໍ້າຖ້ວມທີ່ເໝາະສົມ.

ເພື່ອເປັນການຮັບມືກັບໄພນໍ້າຖ້ວມໃນລະດູຝົນ ປະຈຳປີ 2025, ໃນຕອນເຊົ້າ ຂອງ ວັນທີ 30 ພຶດສະພາ 2025, ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ໄດ້ຈັດກອງປະຊຸມປຶກສາຫາລື ທີ່ກົມອຸຕຸນິຍົມ ແລະ ອຸທົກກະສາດ, ກຊສ ກ່ຽວກັບ ການຕິດຕາມສະພາບນ້ຳ, ອາກາດ, ແຜ່ນດິນໄຫວ ແລະ ຕ້ານໄພນ້ຳຖ້ວມ ຮ່ວມກັບ ກະຊວງ ພະລັງງານ ແລະ ບໍ່ແຮ່, ກະຊວງ ແຮງງານ ສະຫວັດດີການ ແລະ ສັງຄົມ, ກະຊວງ ໂຍທາທິການແລະຂົນສົ່ງ, ກະຊວງ ກະສິກໍາ ແລະ ປ່າໄມ້ ແລະ ບັນດາພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ຂອງແຂວງທົ່ວປະເທດ ແລະ ບັນດາເຂື່ອນໄຟຟ້າພະລັງນໍ້າ ໂດຍຜ່ານລະບົບສື່ສານທາງໄກ. ຈຸດປະສົງຂອງກອງປະຊຸມ ແມ່ນເພື່ອລາຍງານສະພາບອາກາດ; ລະດັບນໍ້າຕາມລຳແມ່ນໍ້າຂອງ ແລະ ແມ່ນໍ້່າສາຂາ, ລາຍງານລະດັບນໍ້າໃນອ່າງເກັບນໍ້າຂອງເຂື່ອນໄຟຟ້າພະລັງນໍ້າທົ່ວປະເທດ ເພື່ອແຈ້ງເຕືອນໃຫ້ແຕ່ລະຂະແໜງການຕ່າງໆຮັບຮູ້ ແລະ ວາງແຜນຮັບມືີຮ່ວມກັນລ່ວງໜ້າ.

ໃນກອງປະຊຸມ ໄດ້ຮັບຟັງການສະເໜີຈາກ ກົມ, ສະຖາບັນ ແລະ ກອງ ຈາກ ກະຊວງ ຊັບພະຍກອນທຳມະຊາດ ແລະ ສິ່ງແວດລ້ອມ ກ່ຽວກັບ ສະພາບລວມຢູ່ໃນອ່າງແມ່ນ້ຳຂອງ ປະຈຳເດືອນ ແລະ ລະດູຝົນ ປີ 2025, ຮັບຟັງລາຍງານສະພາບການຄຸ້ມຄອງໄພນ້ຳຖ້ວມ ໂດຍການປະສານສົົມທົບກັບທຸກພາກສ່ວນທີ່ກ່ຽວຂ້ອງ(ເຂດທີ່ມີອ່າງເກັບນ້ຳ ເພື່ອຕ້ານຖ້ວມ, ເຂດທີ່ສ່ຽງໄພນ້ຳຖ້ວມ) ສະພາບກ່ຽວກັບການຄຸ້ມຄອງຄຸນນະພາບນ້ຳ, ສະພາບອາກາດ, ອຸຕຸກະເສດ, ສະພາບແຜ່ນດິນໄຫວ ແລະ ໄພນ້ຳຖ້ວມ. ນອກຈາກນີ້, ກອງປະຊຸມໄດ້ຮັບຟັງການນໍາສະເໜີຈາກ ກົມນະໂຍບາຍ ແລະ ແຜນພະລັງງານ, ກະຊວງພະລັງງານ ແລະ ບໍ່ແຮ່ ກ່ຽວກັບ ການຕິດຕາມລະດັບນໍ້າ ຢູ່ ອ່າງເກັບນໍ້າຂອງເຂື່ອນໄຟຟ້າ. ຫຼັງຈາກນັ້ນ ກໍໄດ້ມີການປຶກສາຫາລື ປະກອບຄຳຄິດຄຳເຫັນເພື່ອກຽມຮັບມືກັບ ໄພທຳມະຊາດ ທີ່ອາດຈະເກີດຂື້ນ.

ໃນຕອນທ້າຍ ຂອງກອງປະຊຸມ, ທ່ານ ຈັນທະເນດ ບົວລະພາ, ຮອງລັດຖະມົນຕີ ກຊສ ກໍ່ໄດ້ກ່າວຂອບໃຈ ແລະ ຊົມເຊີຍຕໍ່ຂະແໜງການຕ່າງໆ ທີ່ມີຄວາມກຽມພ້ອມ ແລະ ເປັນເຈົ້າການໃນການຮັບມື ກັບ ໄພທຳມະຊາດ ທີ່ອາດເກີດຂຶ້ນ, ສຸດທ້າຍ ທ່ານກໍ່ໄດ້ເນັ້ນຍໍ້າໃຫ້ບັນດາຂະແໜງການຕ່າງໆ ເອົາໃຈໃສ່ຕໍ່ກັບວຽກງານເຝົ້າລະວັງ, ຕິດຕາມ ແລະ ແຈ້ງເຕືອນໄພນໍ້າຖ້ວມ ຂອງ ກົມອຸຕຸນິຍົມ ແລະ ອຸທົກກະສາດ ໂດຍເຮັດວຽກຮ່ວມກັນຢ່າງໃກ້ຊິດ ເພື່ອຫຼຸດຜ່ອນຜົນກະທົບທາງລົບຕໍ່ກັບ ຊີວິດການເປັນຢູ່ ແລະ ຊັບສິນຂອງປະຊາຊົນ.

ຂ່າວໂດຍ: ໜ່ວຍຂ່າວ ກຊສ