News

ທ່ານລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ເຂົ້າຮ່ວມ ກອງປະຊຸມແລກປ່ຽນວິຊາການ (Forum) ດ້ານຊັບພະຍາກອນນໍ້າ ໃນຂອບການຮ່ວມມແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ໂດຍຜ່ານລະບົບກອງປະຊຸມທາງໄກ ໃນລະຫວ່າງວັນທີ 07-08 ທັນວາ 2021, ທີ່ຫ້ອງປະຊຸມ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ), ທ່ານ ນາງ ບຸນຄໍາ ວໍລະຈິດ, ລັດຖະມົນຕີກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ນຳພາຄະນະຜູ້ແທນລາວ ທີ່ປະກອບດ້ວຍ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງການຕ່າງປະເທດ, ກະຊວງພະລັງງານ ແລະ ບໍ່ແຮ່, ແລະ ກະຊວງສາທາລະນະສຸກ ເຂົ້າຮ່ວມ ກອງປະຊຸມແລກປ່ຽນວິຊາການ ດ້ານຊັບພະຍາກອນນໍ້າ ໃນຂອບການຮ່ວມມແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 (2nd Mekong-Lancang Water Resources Cooperation Forum) ໂດຍຜ່ານລະບົບກອງປະຊຸມທາງໄກ. ກອງປະຊຸມຄັ້ງໄດ້ດຳເນີນໄປໂດຍການເປັນປະທານຂອງ ທ່ານ ລີ ກວາອິງ (Li Guoying) ລັດຖະມົນຕີ ກະຊວງຊັບພະຍາກອນນໍ້າ ສປ.ຈີນ ພາຍໃຕ້ຫົວຂໍ້ທີ່ວ່າ “ຮ່ວມກັນແກ້ໄຂສິ່ງທ້າທາຍ ແລະ ຊຸກຍູ້ການພັດທະນາຮ່ວມກັນ” ມີບັນດາ ລັດຖະມົນຕີທີ່ຮັບຜິດຊອບວຽກຊັບພະຍາກອນນຳ້ ຈາກປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງອື່ນໆ (ກໍາປູເຈຍ, ມຽນມາ, ສປປ ລາວ, ໄທ (ຂັ້ນຫົວໜ້າຫ້ອງການ) ແລະ ຫວຽດນາມ) ພ້ອມດ້ວຍຜູ້ແທນຂັ້ນຫົວໜ້າກົມ ຂອງບັນດາປະເທດສະມາຊິກ, ສູນຮ່ວມມືດ້ານຊັບພະຍາກອນນໍ້າແມ່ນໍ້າຂອງ-ແມ່ນໍ້າລ້ານຊ້າງ ສປ.ຈີນ, ບັນດາຊ່ຽວຊານ ຈາກບັນດາສະຖາບັນຄົ້ນຄ້ວາ ຂອງບັນດາປະເທດສະມາຊິກຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ອົງການສະຫະປະຊາຊາດ, ກອງເລຂາ ຄະນະກໍາມາທິການແມ່ນໍ້າຂອງສາກົນ, ອົງການຈັດຕັ້ງສາກົນ, ພະນັກງານ ແລະ ນັກສຶກສາ, ແລະ ຜູ້ສັງເກດການ ເຂົ້າຮ່ວມຫຼາຍກວ່າ 100 ທ່ານ.ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຮ່ວມກັນແລກປ່ຽນທັດສະນະ, ປະສົບການ ແລະ ບູລິມະສິດຂອງການຄຸ້ມຄອງຊັບພະຍາກອນນໍ້າ ພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ເຊິ່ງໄດ້ແບ່ງເປັນ 06 ຫົວຂໍ້ຄືດັ່ງນີ້: 1) ການຮ່ວມມືໃນແມ່ນໍ້າທີ່ໄຫຼຜ່ານຫຼາຍປະເທດ (Transboundary River Cooperation) ແລະ ການແລກປ່ຽນຂໍ້ມູນ-ຂ່າວສານ; 2) ກອງປະຊຸມສໍາລັບ ຊາວໜຸ່ມ ກ່ຽວກັບ ການຮ່ວມມືດ້ານຊັບພະຍາກອນນໍ້າ ໃນແມ່ນໍ້າຂອງ-ແມ່ນໍ້າລ້ານຊ້າງ; 3) ການອະນຸລັກຊັບພະຍາກອນນໍ້າ ແລະ ການພັດທະນາສີຂຽວ; 4) ການຄຸ້ມຄອງຊັບພະຍາກອນນໍ້າແບບເຊື່ອມສານ ແລະ ການປັບຕົວເຂົ້າກັບການປ່ຽນແປງດິນຟ້າອາກາດ; 5) ການພັດທະນາຊົນນະບົດ, ການປົກປັກຮັກສານໍ້າ ແລະ ການປັບປຸງຊີວິດການເປັນຢູ່; ແລະ 6) ການພັດທະນາ ໄຟຟ້າພະລັງນໍ້າແບບຍືນຍົງ ແລະ ການຮັບປະກັນດ້ານພະລັງງານ.ໃນພິທີເປີດກອງປະຊຸມດັ່ງກ່າວ ພາຍຫຼັງທ່ານ ທ່ານ ລີ ກວາອິງ (Li Guoying) ລັດຖະມົນຕີ ກະຊວງຊັບພະຍາກອນນໍ້າ ສປ.ຈີນ ກ່າວເປີດຢ່າງເປັນທາງການແລ້ວ ບັນດາທ່ານລັດຖະມົນຕີ ຂອງ ແຕ່ລະປະເທດເຊິ່ງຮວມມີ ກໍາປູເຈຍ, ສປປ ລາວ, ມຽນມ້າ, ໄທ, ຫວຽດນາມ ແລະ ທ່ານຮອງເລຂາທິການໃຫຍ່ອົງການສະຫະປະຊາຊາດ (UN) ກໍ່ໄດ້ກ່າວມີຄໍາເຫັນ. ໃນນັ້ນ, ທ່ານ ລັດຖະມົນຕີ ກຊສ ກໍໄດ້ກ່າວບົດປາໃສຕໍ່ກອງປະຊຸມຄັ້ງນີ້ ໂດຍໄດ້ຕີລາຄາສູງຕໍ່ການເຂົ້າຮ່ວມກອງປະຊຸມດັ່ງກ່າວ ແລະ ກ່າວຍ້ອງຍໍຊົມເຊີຍຕໍ່ ສປ ຈີນ ທີ່ໄດ້ມີຄວາມພະຍາຍາມໃນການຈັດກອງປະຊຸມ ເຖິງຈະມີສະພາບການແຜ່ລະບາດພະຍາດໂຄວິດກໍຕາມ, ທ່ານ ລັດຖະມົນຕີ ກຊສ ຍັງໄດ້ຍົກໃຫ້ເຫັນບົດບາດ ຄວາມສໍາຄັນ ຂອງການແລກປ່ຽນໃນເວທີວິຊາການທີ່ໄດ້ນໍາໄປສູ່ການສ້າງຄວາມເຂົ້າໃຈ ແລະ ການຮ່ວມກັນແກ້ໄຂບັນຫາ ແລະ ສິ່ງທ້າທາຍຕ່າງໆຮ່ວມກັນ ຂອງບັນດາປະເທດສະມາຊິກຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ. ພ້ອມດຽວກັນນັ້ນ, ທ່ານກໍໄດ້ຍ້ອງຍໍຊົມເຊີຍ ແລະ ຂອບໃຈ ສປ.ຈີນ ທີ່ໄດ້ສະໜັບສະໜູນ ໃຫ້ແກ່ ສປປ ລາວ ກໍ່ຄືບັນດາປະເທດສະມາຊິກອື່ນໆ ໃນການຄຸ້ມຄອງຊັບພະຍາກອນນໍ້າ ເຊັ່ນ: ການອໍານວຍຄວາມສະດວກ ແລະ ການສົ່ງເສີມການສ້າງຄວາມເຂັ້ມແຂງຂອງຂະແໜງຊັບພະຍາກອນນໍ້າ ຂອງ ສປປ ລາວ ໃນການຄຸ້ມຄອງຂໍ້ມູນຂ່າວສານ, ຄວາມປອດໄພຂອງເຂື່ອນ, ການສະໜອງນໍ້າໃນຊົນນະບົດ, ການຕິດຕາມກວດກາອ່າງແມ່ນໍ້າ ແລະ ອື່ນໆ. ທ່ານ ລັດຖະມົນຕີ ກຊສ ຍັງກໍໄດ້ສະແດງທັດສະນະຂອງ ສປປ ລາວ ທີ່ພ້ອມຈະຮ່ວມມືກັບບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ໃນການແກ້ໄຂສິ່ງທ້າທາຍ ແລະ ຊຸກຍູ້ການພັດທະນາຊັບພະຍາກອນນ້ຳ ເພື່ອບັນລຸເປົ້າໝາຍການພັດທະນາແບບຍືນຍົງຮ່ວມກັນ ແລະ ເພື່ອຫັນການຮ່ວມມືໄປສູ່ລວງເລິກ ໂດຍຜ່ານຫຼາຍຮູບແບບ ແລະ ຫຼາຍລະດັບຂອງການຮ່ວມມື