ທ່ານ ພອນປະເສີດ ພູລິພັນ, ຫົວໜ້າກອງເລຂາ ຄະນະກໍາມະການແມ່ນໍ້າຂອງແຫ່ງຊາດ, ສະມາຊິກຄະນະກໍາມະການຮ່ວມ ຄະນະກໍາມາທິການແມ່ນໍ້າຂອງສາກົນ (ຄມສ) ສໍາລັບ ສປປ ລາວ, ປະທານຄະນະກໍາມະການຮ່ວມ ຄມສ ປີ 2025 ໄດ້ເຂົ້າຮ່ວມ ແລະ ເປັນປະທານ ກອງປະຊຸມ ຄູ່ຮ່ວມເຈລະຈາ ຄັ້ງທີ 29 ແລະ ກອງປະຊຸມ ຄະນະກໍາມະການຮ່ວມ ຄມສ ຄັ້ງທີ 60 ໃນລະຫວ່າງວັນທີ 29-30 ກັນຍາ 2025 ທີ່ຜ່ານມາ ຢູ່ທີ່ຫ້ອງປະຊຸມກອງເລຂາ ຄມສ, ນະຄອນຫຼວງວຽງຈັນ. ກອງປະຊຸມ ຄູ່ຮ່ວມເຈລະຈາ ຄັ້ງທີ 29 ມີຜູ້ເຂົ້າຮ່ວມຂັ້ນຫົວໜ້າກົມ (ສະມາຊິກຄະນະກໍາມະການຮ່ວມ ຄມສ) ຈາກ ບັນດາປະເທດສະມາຊິກ ຄມສ (ກໍາປູເຈຍ, ລາວ, ໄທ ແລະ ຫວຽດນາມ), ຄູ່ຮ່ວມເຈລະຈາ ຄມສ (ສປ ຈີນ ແລະ ມຽນມາ) ແລະ ບັນດາພະນັກງານກອງເລຂາ ຄມສ ແລະ ສໍາລັບ ກອງປະຊຸມ ຄະນະກໍາມະການຮ່ວມ ຄມສ ຄັ້ງທີ 60 ແມ່ນມີພຽງຜູ້ເຂົ້າຮ່ວມຂັ້ນຫົວໜ້າກົມຈາກ ບັນດາປະເທດສະມາຊິກ ຄມສ ແລະ ພະນັກງານກອງເລຂາ ຄມສ ເຂົ້າຮ່ວມ.
ກອງປະຊຸມຄູ່ຮ່ວມເຈລະຈາ ຄມສ ຄັ້ງທີ 29 ໃນວັນທີ 29 ກັນຍາ 2025, ກອງປະຊຸມໄດ້ຮັບຟັງການລາຍງານ ແລະ ແລກປ່ຽນຄໍາຄິດຄໍາເຫັນ ຕໍ່ກັບຄວາມຄືບໜ້າໃນການຈັດຕັ້ງປະຕິບັດບັນດາວຽກງານ ລະຫວ່າງ ຄມສ ແລະ ຄູ່ຮ່ວມເຈລະຈາ ເປັນຕົ້ນແມ່ນ:1) ສະພາບອຸຕຸນິຍົມ-ອຸທົກກະສາດ ແລະ ເງື່ອນໄຂທາງສິ່ງແວດລ້ອມໃນອ່າງແມ່ນໍ້າຂອງຕອນລຸ່ມ (ເດືອນເມສາ-ສິງຫາ 2025); 2) ສະພາບເງື່ອນໄຂ ແລະ ຂໍ້ມູນດ້ານອຸຕຸນິຍົມ-ອຸທົກກະສາດໃນອ່າງແມ່ນໍ້າຂອງຕອນເທິງ ແມ່ນໍ້າຂອງ-ແມ່ນໍ້າລ້ານຊ້າງໂດຍສະເພາະ ສປ ຈີນ; 3) ຂໍ້ມູນດ້ານການຄຸ້ມຄອງ ແລະ ພັດທະນາຊັບພະຍາກອນນໍ້າໃນປະເທດມຽນມາ ລວມທັງເຂດອ່າງແມ່ນນໍ້າຂອງ; 4) ຄວາມຄືບໜ້າການຈັດຕັ້ງປະຕິບັດ ການສຶກສາຮ່ວມກັນ ຂອງການປ່ຽນແປງສະພາບນໍ້າໃນອ່າງແມ່ນໍ້າຂອງ-ແມ່ນໍ້າລ້ານຊ້າງ ແລະ ຍຸດທະສາດການປັບຕົວ (ໄລຍະທີ 2); 5) ການຈັດຕັ້ງປະຕິບັດການຕິດຕາມ ແລະ ປະເມີນຄຸນນະພາບນໍ້າຮ່ວມກັບປະເທດມຽນມາ, ໄທ ແລະ ສປປ ລາວ ກ່ຽວກັບສານປົນເປື້ອນຂອງສານໜູ; 6) ຄວາມຄືບໜ້າການຈັດຕັ້ງປະຕິບັດແຜນລະດັບພາກພື້ນ ລວມທັງເຄື່ອງມືຊ່ວຍໃນການຕັດສິນໃຈ; 7) ການແລກປ່ຽນຂໍ້ມູນ-ຂ່າວສານ ສໍາລັບການດໍາເນີນງານຂອງໂຄງການເຂື່ອນໄຟຟ້າພະລັງນໍ້າ; 8 ) ຄວາມຄືບໜ້າກ່ຽວກັບການຮ່ວມມືດ້ານຊັບພະຍາກອນນໍ້າ ແມ່ນໍ້າຂອງ-ແມ່ນໍ້າລ້ານຊ້າງ ລວມເຖິງລະບົບແບ່ງປັນຂໍ້ມູນ ແລະ ການຮ່ວມມືກັບ ກອງເລຂາ ຄມສ.
ໃນກອງປະຊຸມ ຄະນະກໍາມະການຮ່ວມ ຄມສ ຄັ້ງທີ 60 ໃນວັນທີ 30 ກັນຍາ 2025, ຄະນະກໍາມະການຮ່ວມ ຄມສ ໄດ້ພ້ອມກັນພິຈາລະນາອະນຸມັດ ແລະ ຮັບຮອງເອົາບັນດາເອກະສານດັ່ງນີ້: 1) ການປັບປຸງຄູ່ມືຊັບພະຍາກອນມະນຸດ ຄມສ (ພາກທີ 1) ກ່ຽວກັບເງິນບໍາລຸງລ້ຽງການເພິ່ງພາອາໄສ, ພ້ອມດ້ວຍຂໍ້ສັງເກດກ່ຽວກັບບັນຫາອື່ນໆທີ່ກ່ຽວຂ້ອງກັບພະນັກງານ; 2) ອະນຸມັດການປັບປຸງຄູ່ມືການບໍລິຫານງານ ຄມສ; 3) ຮັບຮອງຮ່າງສະບັບສຸດທ້າຍຂອງແຜນຍຸດທະສາດ ຄມສ 2026-2030; 4) ຮັບຮອງຮ່າງສະບັບສຸດທ້າຍຂອງຖະແຫຼງການບາງກອກ; 5) ອະນຸມັດແຜນການຈັດຕັ້ງປະຕິບັດໂຄງການ (PIP) ໄລຍະປີ 2026-2029; 6) ການປັບປຸງການຄຸ້ມຄອງນໍ້າໃນອ່າງນໍ້າຂອງໃນໄລຍະນໍ້າຖ້ວມ; 7) ຄວາມຄືບໜ້າໃນການແບ່ງປັນຂໍ້ມູນການດໍາເນີນງານຂອງໂຄງການເຂື່ອນໄຟຟ້າພະລັງນໍ້າ, ການສະເໜີໃຫ້ມີການແຈ້ງລ່ວງຫນ້າ ແລະ ການສື່ສານໃນສາທາລະນະກ່ຽວກັບການປ່ອຍນໍ້າ ໃນຊ່ວງທີ່ມີຝົນຕົກຫຼາຍ ແລະ 8 ) ການສໍາເລັດໂຄງການວາງແຜນ ການຄຸ້ມຄອງທົ່ວອ່າງສໍາລັບສາຍນ້ໍາຫຼັກ ແລະ ແຜນການຈັດຕັ້ງປະຕິບັດໃນລະຫວ່າງ ແຜນຍຸດທະສາດ ຄມສ 2026-2030.
ນອກຈາກນີ້, ກອງປະຊຸມຍັງໄດ້ຮັບຟັງ ແລະ ປະກອບຄໍາເຫັນ ຕໍ່ກັບການລາຍງານຄວາມຄືບໜ້າ ໃນການຈັດຕັ້ງປະຕິບັດວຽກງານຂອງ ຄມສ ໃນໄລຍະຜ່ານມາ ດັ່ງນີ້: 1) ສະຖານະພາບການເງິນຂອງ ຄມສ (ຮອດວັນທີ 31 ສິງຫາ 2025) ແລະ ການຄາດຄະເນງົບປະມານໃນຕໍ່ໜ້າ (ຮອດເດືອນທັນວາ 2025); 2) ການຈັດຕັ້ງປະຕິບັດຂະບວນປຶກສາຫາລືລ່ວງໜ້າ ສໍາລັບໂຄງການພັດທະນາເຂື່ອນໄຟຟ້າພະລັງນໍ້າ ຊະນະຄາມ ແລະ ພູງອຍ, ພ້ອມທັງແຜນດໍາເນີນງານຮ່ວມ ສໍາລັບໂຄງການພັດທະນາເຂື່ອນໄຟຟ້າພະລັງນໍ້າ ປາກແບງ, ປາກລາຍ ແລະ ຫຼວງພະບາງ; 3) ການຈັດຕັ້ງປະຕິບັດບົດແນະນໍາດ້ານວິຊາການ (TGWG) ພາກທີ 4 ກ່ຽວກັບການປົນເປື້ອນຂອງສານໜູໃນແມ່ນໍ້າຂອງ; 4) ຄວາມຄືບໜ້າຂອງການປັບປຸງໂຄງການສະຫນັບສະຫນູນການຕັດສິນໃຈຂອງ ຄມສ (DSF) ແລະ ການຈັດຕັ້ງປະຕິບັດແຜນລະດັບພາກພື້ນ; 5) ບົດຮຽນທີ່ໄດ້ຈາກການທົດລອງນໍາໃຊ້ບົດແນະນໍາການປະເມີນຜົນກະທົບດ້ານສິ່ງແວດລ້ອມ ຂ້າມຜ່ານຊາຍແດນຂອງ ຄມສ (TbEIA); 6) ລາຍງານກ່ຽວກັບຂະບວນການສະໝັກໂຄງການເພີ່ມທະວີການຄຸ້ມຄອງການປະມົງຂ້າມຜ່ານຊາຍແດນໃນອ່າງແມ່ນໍ້າຂອງຕອນລຸ່ມ ພາຍໃຕ້ການສະໜັບສະໜູນຂອງກອງທຶນສິ່ງແວດລ້ອມໂລກ (GEF); 7) ຮ່າງສຸດທ້າຍຂອງການສຶກສາຄວາມເປັນໄປໄດ້ສໍາລັບການທົດລອງນໍາໃຊ້ກອງທຶນແມ່ນໍ້າຂອງສໍາລັບລະບົບນິເວດວິທະຍາ ແລະ ຮູບແບບການດໍາເນີນການລະອຽດຂອງກອງທຶນແມ່ນໍ້າຂອງ; ແລະ 8 ) ຄວາມຄືບໜ້າຂອງການປັບປຸງບົດບົດແນະນໍາລະບຽບວ່າດ້ວຍການແຈ້ງໃຫ້ຊາບ, ການປຶກສາຫາລືກັນລ່ວງໜ້າ ແລະ ການເຮັດຂໍ້ຕົກລົງ ຂອງ ຄມສ.